نامزەدێ ھەڤپەیمانیا ملەت کەمال کلچدارۆغلو رادگھینە، بانگا پەکەکێ یا ژ بۆ پشتگریکرنا وی، تێ واتەیا پشتگریکرنا نامزەدێ ھەڤپەیمنایا جومھور رەجەب تەییب ئەردۆگان.
نامزەدێ ھەڤپەیمانیا ملەت بۆ پۆستێ سەرۆککۆماریا ترکیێ کەمال کلچدارۆغلو د بەرنامەیەکە تەلەڤیزیۆنی دە ل سەر رەخنەیێن کو پەکەکە پشتگریا وی دکە ئاخڤی و گۆت، پشتگریا پەکەکەیێ یا ژ بۆ وی نە د بەرژەوەندیا وی دە یە، لێ بەلێ د بەرژوەندیا کاندیدێ ھەڤپەیمانیا جومھور ئەردۆگان دە یە.
کلچدارۆغلو گۆت، ھەکە پەکەکە بانگا پشتگریکرنا وی بکە، ئەڤ بانگ د راستیێ دە ژ بۆ پشتگریکرنا ئەردۆگانە و گۆت: “کی ژ قەندیلێ ژ بۆ پشتگریکرنا تفاقا نەتەوی سوودێ وەردگرە؟ پشتگریا مە دکن یان پشتگریا وان دکن؟ عاقل ھەیە، مەنتق ھەیە. ھەگەر رێخستنا تەرۆرێ ببێژە ئەز پشتگریا وە دکم، ئەڤ تێ وێ مانەیێ کو ئەو پشتگریێ ددە ئالیێ دن.”
پەکەکێ ھەتا نھا ب ئاوایەکا فەرمی پشتگریا کلچدارۆغلو نەکربە ژی، د ھن داخویانیێن بەرپرسێن وێ دە پشتگریەکە نەراستەراست ژێ رە ھەیە. ئەردۆگان ژی گەلەک جاران راگھاندبوو کو پەکەکە پشتگریا کلچدارۆغلو دکە، د گۆتارەکا خوە دە ژی دیار کربوو، ملەتێ وی ترکیێ رادەستێ وی کەسی ناکە کو ب پشتگریا پەکەکێ ببە سەرۆککۆمار.
