سەرۆکێ گشتییێ پارتیا دەڤا عەلی باباجان سەردانا دیاربەکر کر و ل گەل پلاتفۆرما ھەڤگرتن و پاراستنا باژێرێ دیاربەکرێ جڤینەک ل دار خست. عەلی باباجان دا زانین، ژ بۆ ئەولەکاریا ھلبژارتنێ بهێت جێبەجێکرن، ئەو دێ وەک تفاقا ملەت ھەموو ھێزا خوە بکار بینن، دەستھلات ژی ژ ھەموو بوویەرێن توندی بەرپرسە.
سەرۆکێ پارتیا دەڤا عەلی باباجان ل دیاربەکر ل ئاڤاھیا ژوورا پیشەسازی و بازرگانیا دیاربەکر ل گەل پلاتفۆرما ھەڤگرتن و پاراستنا باژێرێ دیاربەکر جڤینەک لدار خست.
عەلی باباجان ژ ئالیێ سەرۆکێ ژوورا پیشەسازی و بازرگانیا دیاربەکر محەمەد کایا و ھەڤگرتیێن پلاتفۆرمێ ڤە ھات پێشوازیکرن.
باباجان د جڤینێ دە ئاماژە کر، ئەو کەسێن دبێژن 6 پارتی نکارن ل ھەڤ بکن بلا بزانن کو ژ خوە مە ل ھەڤ کریە کو ھەتا ئەم ل جەم ھەڤن و پەیمانەک ژ 2300 خالان پێک تێ ئیمزە کرنە.
باباجان د جڤینێ دە بۆ جۆتکاران پرۆژەیێن خوە پێشکێش کرن و دا زانین کو دێ نیڤا لێچوونا سەمادێ ژ ئالیێ دەولەتێ ڤە هێت دایین، بھایێ سۆتەمەنیێ هێت داخستن، دێ د 5 سالان دە ھەموو وەبەرھێنانێن ئاڤی هێن تەمامکرن، دێ فایزا دەینێ جۆتکاتان هێت ژێبرن.
باباجان بال کشاند کو تفاقا ملەت نە تەنێ ژ بۆ ھلبژارتنان ھاتیە ئاڤاکرن، د ھەمان دەمێ دە ژ بۆ ب ھەڤرە دەولەتێ برێڤەببن ھاتیە ئاڤاکرن و دێ ب ھەڤرە دەولەتێ دەرخن ئاستا ھەری باش.
دەربارێ مافێ پەروەردەھیا زمانێ زکماکی دە ژی باباجان گۆت، وان د ڤێ مژارێ دە ب ناڤێ پلانا جێبەجێکرنا مافێن بنگەھین پرتووکەک ئامادە کریە و تێ دە بۆ ڤی مافی ھەر تشت ھاتیە دەستنیشانکرن.
باباجان دەربارێ ئەولەکاریا ھلبژارتنێ دە ژی بانگ کر کو ھەر وەلاتیەک دکارە ببە چاڤدێرێ سندۆقان و بلا پەیوردارێن سندۆقان ژی پشتی ھژمارتنا دەنگان وێنەیێ ئەنجامان بکێشن و د تۆرا ھەڤپار دە پارڤە بکن دا کو ئەنجامێن ژ ھەڤ جودا دەرنەکەڤن ھۆلێ.
عەلی باباجان دەربارێ بوویەرێن توندیێ و گۆتنێن ب سڤکاتی دە ژی بانگا سەقەمگریێ کر و بال کێشاند کو ژ ھەر توندیەک و برینداربوونەکێ دەستھلات بەرپرسە.
