ژ رێڤەبەرێن پەکەکێ مراد قارایلان، ڤان رۆژێن داوی ل سەر ئەکرانێن تیڤیێ ل سەر رۆژەڤا ھلبژارتنێ دئاخڤە و بانگاوازییان دکە. ھەری داوی ژ چاپەمەنیا پەکەکێ یا ب ناڤێ ANF رە ئاخڤی. قارایلان د داخویانیا خوە دە بال کشاند سەر گەلەک مژاران، ب تایبەتی ل سەر مژارا ئۆجالان راوەستیا. قارایلان بال کشاند سەر رۆلا ئۆجالان یا کاریگەر د یەکیتیا ترکیەیێ دە.
قارایلان د داخویانیێ دە گۆت؛ “دڤێت ھەر کەس باش بزانە کو رێبەر ئاپۆ بنگەھا یەکیتیا ترکیەیێ یە. گەر د ڤی واری دە خسارەک چێبە دێ یەکتیا ترکییێ نەمینە. نە ب دەھان سالان، ب سەدان سالان د ناڤبەرا گەلان دە دژمناتیەک ماییندە دەست پێ دکە. ژ بۆ ڤێ ژی دڤێ ھەر کەس ب بەرپرسیاری تەڤبگەرە.”
ئۆجالان: ئەز دخوازم خزمەتکارێ ترکیەیێ بم
د سالا 1999 دە دەما رێبەرێ پەکەکێ عەڤدلا ئۆجالان ژ کینیایێ ئانین ترکیەیێ، د بالافرێ دە ئاخڤی و گۆت، “دایکا من ترکە، گەر ژ بۆ دەولەتێ خزمەتەک پێویست بە ئەزێ بکم.”
پشتی گرتنا ئۆجالان دەمەک کن دە پەکەکێ دەڤ ژ ئارمانجا “کوردستانا سەربخوە و یەکبوویی” یا کو ب سالان دپاراست، بەردا و ئیدیعا کر کو “کورد نە پێدڤی دەولەتەکا جوودا نە”. پەکەکێ گۆت “دەما نەتەو دەولەتان دەرباس بوویە” و ئەڤ فکر وەکی پارادیگمایا سەردەما نوو پەژراند.
پاشێ د سالا 1999 دە ئاخافتنێن عەڤدلا ئۆجالان یێن لگەل فەرماندارێ ئارتێشا ترک «حەسەن ئاتیلا ئوگور» ل ئیمرالیێ کری، ھاتن وەشاندن. د ڤان ئاخافتنان دە ئۆجالان ژ ئەفسەرێ ترک ئوگور رە دبێژە؛ “ئەزێ ببم مقاولێ دەولەتا ترک، بلا دەولەت مەجالی بۆمن ڤەکە، ئەزێ ترکان ل رۆژھلاتا ناڤین بکم ھێزا ھەری مەزن.” ئۆجالان د ھەمان ئاخافتنان دە گۆت، “ھنەک ھێز دخوازن ل ھەولێرێ دەولەتەکە کوردی ئاڤا بکن، ئەڤ ژ بۆ ترکیەیێ خەتەرەکی پڕ مەزنە. ھوون وەکە دەولەت پشتگریا مە بکن، ئەم ب ھەڤ رە ھەولێرێ ژ وان بگرن و ئەم وەناکن کو بارزانی و تالەبانی نەفەسا خوە هلکێشن.”
ئۆجالان د داخویانییەکا خوە دە دیار کر کو ئەو دێ ھەول بدە کو ترکییێ ڤەگەرینە بۆ سینۆرێن میساقا- ملی. ئەڤ گۆتنێن مراد قارایلان یێن وەکە “ئۆجالان گارانتۆرێ یەکتیا ترکیێیە” گۆتنێن ئۆجالانێن بەرێ ژ دەولەتێ رە کری تینە بیرا مرۆڤ.
گەلۆ ما ژیانا ئۆجالان د مەترسیێ دەیە؟
قارایلان د ئاخافتنا خوە دە ئانی زمان کو ژیانا رێبەرێ وان عەڤدلا ئۆجالان د خەتەریێ دەیە. مراد قارایلان ئیدیعا کر کو د پێڤاژۆیا ھلبژارتنێ دە عەڤدلا ئۆجەلان پر خستنە رۆژەڤێ و گۆت، “ئەڤ یەک بۆ مە جھێ گومانێیە کو رێبەر ئاپۆ بکن ئارمانچ. د ڤێ چارچۆڤەیێ دە ئێدی ئەولەھیا رێبەر ئاپۆ د بن مەترسییێ دایە.”
تێ فکرین کو ئەڤ گۆتنا مراد قارایلان ژ راستییێ دوورە و بێ واتەیە. تەنێ ژ بۆ پرۆپاگاندایێ ئەڤ رۆژەڤ تێ ڤەکرن. عەڤدلا ئۆجالان ب خوە دگۆت کو ژییانا وی یا ئیمرالی ژ یا شامێ ئەولەترە. وەکە کو ھەموو رایا گشتیا کورد پێدزانە ژ سالا 1999 و ڤر ڤە 24 سالن دەولەتا ترک ب دەستێ عەڤدلا ئۆجالان سیاسەتا باکورێ کوردستانێ کۆنترۆل دکە. ل گۆری داخوازییێن دەولەتێ، ئۆجالان دەما پێویست بکە ئاگربەستێ و دەما پێدڤی بکە شەری رادگهینە. ژ بۆ ڤێ یەکێ ساخییا ئۆجەلان ژ بۆ دەولەتێ پر پێویست و گرنگە.
گەلێ کورد دێ ژ بۆ ئۆجالان داکەڤن کۆلانان؟
ھەر وھا چاڤدێرێن سیاسی دبێژن کو ل باکورێ کوردستانێ ژ بلی کۆمەکا ڤەدەرا پەکەکێ چ کەس بوو ئۆجالان خوەپێشاندانا ناکە. ل باکورێ کوردستانێ تەڤی ھەموو بانگ و خەباتا پەکەکێ گەلێ کورد بەشداری چالاکیێن ژ بۆ ئۆجالان تێنە کرن نابە. واتە نها چ وەرە سەرێ ئۆجالان ژی گەلێ کورد وەکە سالا 1999 ژ بۆ ئۆجالان بەرتەک نیشان نادە.
لێ تێ ھزرکرن قارایلان ژ بەر ھندەک حەسابێن سییاسی بەریا ھلبژارتنان ژیانا ئۆجالان دخە رۆژەڤێ. پەکەکێ گاڤا کو خوەست جەماوەرێ خوە چالاک بکە دبێژە؛ “رێبەر ئاپۆ ژەھری کرنە، رێبەر ئاپۆ کریزا دل دەرباس کر” و ھتد. ئەڤ گۆتن و ھەولێن رێڤەبەرییا پەکەکێ ددە خویا کرن کو پشتی ھلبژارتنان ھندەک گاڤێن سییاسی یێن پلانکری ھەنە.
