کۆمیسیۆنا بلندا هلبژارتنان يا ترکیێ ئەنجامێن دەستپێکێ یێن ژ 94% يا دەنگان ئاشکەرە کرن و هەتا نها ئەردۆگان ل پێش کلچدارۆگلو يە.
سەرۆکێ کۆمسیۆنا بلندا هلبژارتنان ئه‌حمه‌د یەنەر راگهاند، ل گۆری ئەنجامێن دەستپێکێ رەجەپ تاییپ ئەردۆگان % 49.9ێ دەنگ ب دەست خستنە، کەمال کلچدارۆگلو ژی % 44.7 دەنگ وەرگرتنە. هەر وها سینان ئۆگان ژ % 5،29 و موحه‌ره‌م ئینجە ژی ژ سەدی 0،43 دەنگ بدەست خستنە.
دەربارێ پارتیێن کو بەندا % 7 دەرباز کرنە دە، یەنەر دا زانین کو ئاک پارتی، مه‌هه‌په و یەنیدان رافاهـ ژ % 7 زێدەتر دەنگ وەرگرتنە. هەر وها جه‌هه‌په و ئی پارتی یێن د ناڤا تفاقا مللەتێ دە، پارتیا چەپا کەسک و پارتیا کارکەرێن ترکا د ناڤا تفاقا کەد و ئازادیێ دە ژی ئەڤ بەند دەرباس کرن.
سەرۆکێ کۆمسیۆنا بلندا هلبژارتنان دیار کر، هەتا ئەنجامێن داوی نەین ئەشکەرەکرن، ئەو نزانن دێ هلبژارتنێن سەرۆكکۆماریێ دەرباسی گەرا دویەم ببە یان نا.
رۆژا یەکشەمێ 14ێ گولانا 2023ان هلبژارتنێن سەرۆکكۆماری و پارلامەنتۆیا ترکیێ ژ دەمژمێر 8:00 هەتا دەمژمێر 17.00ێ ئێڤاری هاتن کرن و رێژەیا بەشداریێ ژی % 88.
ل گۆر یاسایێ، ئەگەر د گەرا یەکەم دە هەر نامزەدەکی سەرۆکۆماریێ زێدەتر ژ % 50ێ دەنگان بدەست نەخست، هلبژارتن دچە گەرا دویەم کو بریارە رۆژا 28ێ گولانێ د ناڤبەرا هەر دو نامزەدێن کو هەری زێدە دەنگ بدەست خستن دە وەرە کرن.
هه‌ڤركییا سەرەکە د ناڤبەرا نامزەدێ تفاقا جومهور رەجەپ تاییپ ئەردۆگان و نامزەدێ تفاقا مللەت کەمال کلچدارۆگلو دە یە، ژ بۆ بگهن کۆچکا چانکایایێ و 5 سالان د پۆستا سەرۆکۆماریێ دە بمینن.
