بەربژێرێ تفاقا ملله‌ت کەمال كلچدارئۆغلو گۆت: «ئەگەر ئەز ب قەندیل و په‌كه‌كێ رە هەڤدیتن دکم، تو دێ دەلیلێن ڤێ دەرخی و دەینی پێش گەل، کەلەپچێ ل دەستێ من بخێ باڤێژی دادگەهێ. تشتەک وسا تونە. ئەگەر ئەز ب رەخستنەکە تەرۆرێ رە موخاته‌ب بوویمه، ئەگەر ئەز هاتبم کێلەکا تەرۆریستەکی پێ رە ئاخڤیبم، خوەدێ بەلا من بدە. بەرۆڤاژی یێن ڤێ ئیفترایێ دئاڤێژن خوەدێ بەلا وان بدە».
بەربژێرێ تفاقا ملله‌ت یێ سەرۆککۆمارییا ترکیێ و سەرۆکێ گشتی یێ جه‌هه‌پێ کەمال كلچدارئۆغلو بەشداری وەشانا زندی یا فوكس تی ڤی بوو و ئه‌ڤ په‌یام دا ئاردۆگان.
«ما به‌ربژێره‌كێ سەرۆککۆماریێ پشتا خوە دسپێرە ڤیدیۆیێن مۆنتاژ؟»
کەمال كلچدارئۆغلو ل سەر پرسا دەربارێ ئیدیعایێن ڤیدیۆیا مۆنتاژ دە گۆت «تشتێن ل سەر دەرەوان، بوختانان تێن کرن. ما دەرەونە گونەهە؟ هوون مۆنتاژ دکن. هوون دەنگان تەقلید دکن. هوون وێنەیان تینن و ب وێ ژی هوون ژ گەلێ خوە، وەلاتیێن خوە رە دەرەوان دکن. هوون ژ کەسێ کو ڤیدیۆیەک سەختە چێدکە دبێژن چ؟ ژێ رە دبێژن سەختەکار.مرۆڤەکی سەختەکار دکارە ببە سەرۆککۆمار؟ ڤیدیۆیێ سەختە هەنە؟ بەلێ هەیە. گۆت مۆنتاژە؟ بەلێ گۆت. ل خوە مکور هات؟ مکور هات. ما به‌ربژێرەکی سەرۆککۆماریێ پشتا خوە دسپێرە ڤیدیۆیێن مۆنتاژ؟»
كلچدارئۆغلو، دیار کر کو وان تێکلداری مژارێ دە سەری ل دادگەهێ دانە و دبێژە «دادگەهێ قەدەخە کر. چما؟ دادگەهـ دزانە کو ئەو سەختەنە. یانی مە ب بریارا دادگەهێ ئیسپات کر سەرۆککۆمارێ وەلاتەکی ڤیدیۆیێن سەختە وەشاندیە، مرۆڤان رەش دکە و ئیفترا دئاڤێژە.
«ئەگەر ئەز ب قەندیل یان ژی په‌كه‌كێ هەڤدیتن بکم تو دێ دەلیلێن ڤێ دەرخی»
ل سەر پرسا «برێز ئاردۆگان وە ب هەڤکاریا تەرۆریستان تاوانبار دکە. وە ژی گۆت «دەرێن هەمبەری من، ئەزێ ئیسپات بکم کو هوون پێشمێرێ ڤان تەرۆریستانن. هوونێ ل سەر ڤێ مژارێ ئیسپاتێن خوە ژ مە رە چاوا بینن زمان؟ ئاردۆگان چاوا پێشمێریا تەرۆریستان دکە؟» کلچدارئۆگلو وها بەرسڤ دا:
«نها یێ ب وان رە روودنی دئاخڤە ئەوە. رۆژێ 24 دەمژمێران یێ ب وان رە داخڤە و مە رەش دکە ئەوە. ئەم دبن موخاته‌بێ هەر جورەیێن سووجدارکرنێ. ئەم دەولەتێ برێڤە نابن. ئەزبەنی، دبێژە كلچدارئۆغلو ب قەندیلێ رە دئاخڤە، كلچدارئۆغلو ب قەندیلێ رە هەڤدیتن دکە. مرۆڤێ کو ڤێ دبێژە ئەز وی وەک مرۆڤ قەبوول ناکم. برێ من دەولەتەکی برێڤە دبی. ل ڤێ دەولەتێ سازیەک ب ناڤێ سازیا ئیستخباراتا نەتەوەیی هەیە. ئەگەر ئەز ب قەندیل و په‌كه‌كێ رە هەڤدیتن دکم، تو دێ دەلیلێن ڤێ دەرخی دەینی پێش گەل، کەلەپچە ل دەستێ من بخێ باڤێژی دادگەهێ. تشتەک وسا تونە. ئەگەر ئەز ب رەخستنەکە تەرۆرێ رە موخاته‌ب بوویمه، ئەگەر ئەز هاتبم کێلەکا تەرۆریستەکی پێ رە ئاخڤیبم، خوەدێ بەلا من بدە. بەرۆڤاژی یێن ڤێ ئیفترایێ دئاڤێژن خوەدێ بەلا وان بدە».
كلچدارئۆغلو دەربارێ هەڤسەرۆکێ په‌یه‌دێ سالح موسلم دە ئاخڤی و گۆت «نها ئەو ژی ئاخڤیە.یێ کو وی دایە ئاخاڤتن ژی دناسم. د دەولەتێ دە کی سالح موسلم دایە ئاخاڤتن ژی دناسم. گاڤا دەما وێ هات، ئەز دێ ناڤێ وی ژی ئەشکەرە بکم. یێن کو د سازیێن هەری هەساسێن دەولەتێ دەنە ژ بۆ دەولەتا خوە، ژ بۆ قەسرا خوە ددن دخەبتاندن، وان ددن ئاخافتن».
«ل من ببۆرە، تونە نەتەوەپەروەری»
دەربارێ داخویانیێن هودا-پارێ یێن ل سەر مەتنا سۆندا پارلامەنتۆیێ دە كلچدارئۆغلو وها ئاخڤی “نها ئەز دخوازم بانگی مه‌هه‌پێ، یانی برایێن خوەیێن ئولکوجو (نژادپەرەستێن ترک)، یانی برایێن خوە یێن کو خوە وەک نەتەوەپەرەست پێناسە دکن، بکم. ئەگەر هوون نەخوازن ببن هەڤکارێ ڤی سووجی و هوون ناخوازن دەنگێن خوە بدن من ژی، نەچن سەر سندۆقان. نەبە هەڤکارێ ڤی سووجی. یانی برێ من دەنگێ خوە نەدە پارتی و کەسێ کو دبێژە «ئەمێ 4 خالێن ئەولێن ماکەزاگۆنا کۆمارا ترکیەیێ بگوهەرینن.» ئەگەر تو دەنگ بدیێ، ل من ببۆرە، تونە نەتەوەپەروەری. تو ئەلەقەیا تە ب نەتەوپەروەریێ رە نینە”.
«ئەمێ بستینن»
كلچدارئۆغلو ل سەر پرسا ئەنجامێ ژی وها گۆت: “ئەمێ بستینن. یانی مە ئەڤقاس تشت گۆتن.یێن کو ل مە گوهداری دکن بەلکی دەستێ خوە دەینن سەر وژدانێ خوە و بچن سەر سندۆقان، دێ دەنگێ خوە بدن”.
چاڤكانی: رووداو
