ھاکان فیدان: ئامەریکا و ئیران د مژارا ئاگربەستێ دە جدی نە
وەزیرێ دەرڤەیێ ترکیەیێ ھاکان فیدان، د چارچۆڤەیا بەرنامەیا “ماسەیا ئەدیتۆران” یا ئاژانسا ئانادۆلویێ دە، نرخاندنێن گرنگ ل سەر گرژیێن ناڤبەرا ئامەریکا و ئیرانێ کرن. فیدان دەستنیشان کر کو ھەر دو ئالی ژی گرینگیا ئاگربەستێ فێم دکن و د ڤێ مژارێ دە خوەدی ھەلوەستەکە جدی نە. فیدان دیار کر کو ئەڤ ئاگربەست ژ بۆ دابینکرنا ئارامیا ھەرێمی پێدڤیەکە ژیانییە.
د بەردەوامیا ئاخافتنا خوە دە، فیدان بال کشاند سەر کریزا ل تەنگاڤا ھورمزێ و دیار کر کو ترکیە ئالیگرێ چارەسەریێن دیپلۆماتیکە. وەزیر فیدان ھشیاری دا کو ئاڤاکرنا “ھێزەکە چەکدارا ناڤدەولەتی” ژ بۆ پاراستنا تەنگاڤێ دبە کو ببە سەدەما زەحمەتیێن مەزنتر و دەستنیشان کر کو ئەنقەرە ژ بۆ رێگرتنا ل کارەساتێن نوویێن شەر، ب ھەموو ئالیان رە د پەیوەندیێ دەیە.
ل ئالیێ دن، ل واشنگتۆنێ ئامادەکاریێن نوویێن لەشکەری د رۆژەڤێ دە نە. ل گۆری نووچەیا رۆژنامەیا واڵ سترێت جۆرنال، سەرۆکێ ئامەریکایێ دۆنالد ترامپ ژ بەر خەتمینا دانوستاندنێن ل پاکستانێ، ڤەبژارکێن وەکی ئێریشێن لەشکەری یێن سینۆردار و دۆرپێچا دەریایی یا ل سەر تەنگاڤا ھورمزێ دنرخینە. بەرپرسێن ئامەریکی دبێژن ھەر چەند شەرەکی گشتگیر نە د رۆژەڤێ دە بە ژی، لێ زەختێن لەشکەری یێن سینۆردار وەکی ئاموورەکە زەختێ تێنە بکارئانین.
د گەشەدانەکە ھەری داوی دە، فەرمانداریا ناڤەندییا ئامەریکایێ (سێنتکۆم) راگھاند کو ئەوێ ئیرۆ دەمژمێر 10:00ێ ئێڤارێ (ب دەما ئامەریکایێ) دۆرپێچەکە دەریایی دەینن سەر بەندەرێن ئیرانێ. ئەڤ بریار وەکی قۆناغەکە نوویا زەختێن ئابۆری و لەشکەری ل سەر تەھرانێ تێ نرخاندن.
سێنتکۆمێ ئەشکەرە کر کو ئەڤ دۆرپێچ دێ ب ئاوایەکی بێالی ل سەر ھەموو کەشتیێن کو بەر ب بەندەرێن ئیرانێ ڤە دچن یان ژی ژێ دەردکەڤن وەرە سەپاندن. ھات دەستنیشانکرن کو کەشتیێن بازرگانی یێن ناڤدەولەتی یێن کو تەنێ تەنگاڤا ھورموزێ وەکی رێگەھەکێ بکار تینن و ئارمانجا وان نە بەندەرێن ئیرانێ نە، دێ کاربن گەشتێن خوە بدۆمینن.
