ئاساییشا پەیەدێ 4 گەریلا د زیندانێ دە گولـلەباران کرن
ئاساییشا پەیدەێ 4 گاریلایێن پەکەکێ یێن کو دخوەستن ژ رۆژئاڤا دەرباسی باکورێ کوردستانێ ببن و خوە تەسلیمی میتا ترکیێ بکن ل سەر سینۆر دەستەسەر کرن و پشترە ئەو د زیندانێ دە گولـلەباران کرن.
چاڤکانیێن تایبەت یێن پێگەها دارکا مازی ل رۆژئاڤا کوردستانێ ئەشکەرە کرن، ل رۆژا 6/5/2023ان 4 گەریلایێن پەکەکێ کو دخوەستن ب ئاوایەکی نهێنی ژ حەسەکێ دەرباسی قەزا دێرکێ ببن هەیا کو ژ ور بەر ب ترکیێ ڤە هەرن و خوە تەسلیمی میتا ترکیێ بکن، ل سەر سینۆرێ د نێڤبەرا ولاتێ ترکیێ و رۆژئاڤا کوردستانێ ژ ئالیێ چەکدارێن یەپەگێ ڤە هاتن دەستەسەرکرن.
چاڤکانیێن دارکا مازی تەکەز کرن، پشتی کو چەکدارێن سەر ب یەپەگێ ئەڤ 4 گەریلا دەستەسەرکری ژ بۆی گرتیخانەیێن ئاساییسا پەیەدێ رەوانە کرن و پشترە ئاساییشێ لێپرسین ب وان 4 گەریلایان رە کر و پشتی دەرباسبوونا چەند رۆژان هەر د مەها 5 یا ئیسال دە د زندانا ئاساییشا پەیەدێ یا ل قەزا دێرکێ ئەو گولـلەباران کرن و کوشتن.
چاڤکانیێن دارکا مازی هەر وەها ئەشکەرە کرن، پشتی کو ئەڤ 4 گەریلا ژ ئالیێ ئاساییشا پەیەدێ ڤە تێن گولـلەباران کرن و کوشتن جەنازەیێ وان ل سینۆرێ ناحیەیا شەدادیێ یا سەر ب پارێزگەها حەسەکێ ڤە هاتینە بنئاخکرن و پەکەکە دخوازە د دەمێن بهێت دە وان وەکە شەهید رابگهینە.
دارکا مازی ناسنامەیا گەریلایێن هاتینە کوشتن ئەشکەرە دکە:
سالح عەبدوللا چەلیک، ب کۆدناڤێ بەرخوەدان ئاگر، ناڤێ داییکا وی حسینە، ژ شێنیێن باژارۆکێ قزلتەپە یێ سەر ب پارێزگەها مێردینێ یە.
بۆتان ئۆرهان سەردار، ب کۆدناڤێ هاکان ئایدن، ناڤێ داییکا وی سەعادەت، ژ باژارێ مۆشێ یە.
ئەرکان تەمەر دەکیر، ب کۆدناڤێ جەگەرخوین، ناڤێ داییکا وی زایدە، ژ پارێزگەها ئامەدێ یە.
سەرحەد عەبدولرەحمان دنلی، ب کۆدناڤێ دلۆڤان جودی، ناڤێ داییکا وی خوناڤ، ژ پارێزگەها شەرنەخێ.
