بەرپرسەکی پەکەکێ ل رۆژئاڤا کوردستانێ دەستدرێژیا سێکسی ل سەر کەچەکە 17 سالی کر و ئەو دوجانی کر، ژ بەر ڤێ سەدەمێ کەچکێ خوە کوشت.
چاڤکانیێن پێگەها دارکا مازی ل رۆژئاڤا کوردستانێ ئەشکەرە کرن، وەلید فەیاز عەبدی خەلکێ گوندێ ئەل-قاسمیە یێ سەر ب باژارۆکێ کۆبانێ و بەرپرسێ رێخستنا ب ناڤێ “جوانێن شۆرەشگەر” یا سەر ب پەیەدێ ڤە ل باشوورێ باژارێ کۆبانێ، تەجاویزی سەر کەچەکە چەکدار یا سەر ب هێزێن YPJ یا ب ناڤێ “مزگین بەهائەدین حاج خەلیل” کریە.
چاڤکانیێن دارکا مازی تەکەز کرن، مزگین بەهائەدین حاج خەلیل تەمەن 17 سالییە و ب سەدەما ڤێ دەستدرێژیێ ئەو کەچ ب دوگیان بوویە، ژ بەر ڤێ یەکێ مزگینێ ل رۆژا 20/5/2023 د مالا خوە دە ب رێیا وەریسەکی خوە سێدارە دایە و داوی ب ژیانا خوە ئانیە.
چاڤکانیێن مە هەر وها تەکەز کرن، تەڤی کو پرانیا کەسوکارێن مزگینێ سەر ب پەکەکێ و پەیەدێ نە ژی و داخوازا رادەستکرنا وەلید و کوشتنا وی کرنە، لێ بەلێ هەیا نها پەکەکێ و شاخا وێ یا رۆژئاڤا کوردستانێ پەیەدێ ت لێپرسینەک ل همبەر ڤی بەرپرسێ خوە نەکریە و ئەو سزا نەدایە، لۆما پێتری 20 کەسان ژ کەسوکارێن مزگینێ دەست ژ رەفێن پەیەدێ بەردانە.
وەلید فەیاز عەبدی یەک ژ بەرپرسێن رێخستنا ب ناڤێ “جوانێن شۆرەشگەر”ە کو ل باشوورێ باژارۆکێ کۆبانیێ رۆلەکە بالا د خاپاندن و رەڤاندنا زارۆکان بۆ ناڤا رەفێن YPG و YPJ دە هەیە و ب سەدان زارۆک د بەرژەوەندیا پەکەکێ دە رەڤاندنە و ب زۆرێ ئەو دەرباسی کامپێن چەکداریا ب زۆرێ کرنە.
