به‌رپرسه‌كی حه‌شدا شه‌عبی هه‌مولاتییه‌كی كرستیان یێ ناڤچه‌یا به‌رتله گوللـه‌باران دكه و د جیهـ ده د كوژه، پشتی كو شه‌ره‌ده‌ڤه‌ك د نێڤبه‌را وان ده روودای.
چاڤکانیێن پێگەها «دارکا مازی» ئەشکەرە کرن، به‌رپرسێ میلیشیایێن عه‌سائیب ئه‌هلولحه‌ق یێن ل گوندێ عەلی رەش یێ سەر ب ناڤچەیا به‌رتله ب ناڤێ «سابر حەسەن عەباس ئەلموسەوی»، ل رۆژا 27/5/2023ێ ده‌ستدرێژییا گوللـه‌یان كره سه‌ر هه‌مولاتیه‌كی كرستیان ب ناڤێ «سەعد متی سلیوە» كو نیشته‌جیهێ به‌رتله‌یه و د جیهـ ده داوی ب ژیانا وی ئانی.
هه‌ر وها ده‌ستنیشان كر، ئه‌ڤ ته‌وان پشتی شه‌ره‌ده‌ڤه‌كێ پێكهاتییه كو د نێڤبه‌را به‌رپرسێ عه‌سائیب ئه‌هلولحه‌ق و وی هه‌مولاتیێ كرستیان ده چێببوو.
ل گۆری ئاگاهیێن ده‌ستێ مه، ئه‌ڤ وه‌لاتیێ كو ب گوللـه‌یان هاتییه كوشتن، ژ نیشته‌جیهێن تاخا سه‌لام یا ل به‌رتله‌یێ یه.
چاڤکانیێن «دارکا مازی» هەر وەها ئەشکەرە کرن، پشتی کو ئەڤ برپرسێ حەشدا شەعبی ولاتیێ کرستیان دکوژە، درەڤە و خوە وندا دکە و تەڤی کو سازیێن ئەولەهیێ یێن سەر ب میلیشیایێن حەشدا شەعبی ب جیهێ وی دزانن، لێبەلێ هەیا نها ئەو نەگرتیە و همبه‌ری دادگەهێ نەکری یە.
میلیشیایێن حەشدا شەعبی ب ئاوایەکی بەردەوام سته‌م و زۆریێ و د دەرحەق تەڤ گەلێن ئیراقێ ب تایبەت کورد و كرستیانان دە دکن و ژ بەر گەف و هەرەشەیێن ڤان میلیشیایان ژی ولاتیێن کرستیان نەچار دبن جیهو وارێن خوە ل باشوور و ناڤەراستا ئیراقێ بتەرکینن و به‌رێ خوه بدن باشوورێ کوردستانێ، هەیا کو بکارن د کەشەکە گونجاو و دوور ژ زۆلم و زۆرداریێ بژین.
