بەردەڤکێ ئەنجوومەنا ئاساییشا نەتەوییا ئامەریکایێ یێ ل کۆشکا سپی ئادەم ھۆدج راگھاند، ئامەریکا پێشوازیێ ل سەردانا میرێ قەتەرێ بۆ بەغدایێ دکە.
ل گۆر داخویانیا ئەنجوومەنا ئاساییشا نەتەوییا ئامەریکایێ یا ل کۆشکا سپی، ژ بۆ پێشڤەبرنا ھەماھەنگیا ناڤبەرا بەغدا و ھەرێما کوردستانێ، واشنگتۆن پێشوازیێ ل بەشداری و دانووستاندنێن سەرۆکێ ھەرێما کوردستانێ نێچیرڤان بارزانی دکە.
بەردەڤکێ ئەنجوومەنا ئاساییشا نەتەوی یا ئامەریکایێ د داخویانیا رۆژا ئینێ دە دەستنیشان کرییە کو پرۆژەیا گرێدانا تۆرا ئەلەکتریکا ئیراق و ئوردنێ ب ھەڤکاری و رێخوەشکرنا ئامەریکایێ دەستەبەر بوویە و ل سەر ڤێ مژارێ راگھاندیە: “ئامەریکا پشتەڤانیا پێشڤەبرنا ھەماھەنگیا ناڤبەرا ئیراق و وەلاتێن کەنداڤێ و عەرەبی دکە.”
ھەروھا د ڤێ چارچۆڤەیێ دە ئامەریکا پشتەڤانیا پێنگاڤێن بەغدایێ ژ بۆ دەستبەربوونا سەربخوەییا ئەنەرژی و گرێدانا تۆرا ئەلەکتریکا ئیراقێ ب کەنداڤێ و ئوردنێ دکە و ڤێ پرۆسەیێ ژی وەک دەستکەفتەکە سەردانا سالا بۆرییا سەرۆکێ ئامەریکایێ جۆ بایدن بۆ رۆژھلاتا ناڤین دبینە. گرێبەستا پرۆژەیێ ژ دەستپێکا ئیسال ڤە لگەل کۆمپانیا تۆتال ئەنەرگ، کۆمپانیێن ئامەریکا و قەتەرێ ھاتیە ئیمزەکرن د وارێ گازێ دە پێویستیا ئیراقیان دابین و بھەدەردانا گازێ کێم دکە.
رۆژا پێنجشەمێ 15 خزیرانا 2023، میرێ قەتەرێ تەمیم بن حەمەد سەردانا بەغدایێ کر، سەرۆکێ ھەرێما کوردستانێ نێچیرڤان بارزانی لگەل سەرۆکوەزیرێ ئیراقێ محەمەد شیاع سوودانی و سەرۆکێ پارلامەنتۆیا ئیراقێ محەمەد حەلبووسی پێشوازی لێ ھات کرن و لگەل وان جڤیا و د ھەڤدیتنێ دە بەحسا پێشڤەبرنا پێوەندیێن ھەرێما کوردستانێ و ئیراقێ لگەل قەتەرێ ھات کرن.
