شوونوارەکی دیرۆکی کو دیرۆکا وێ ڤەدگەرە زێدەتری 11 ھەزار سال بەرێ، ل پارێزگەھا سلێمانیێ ھات دیتن. پارێزگارێ سلێمانیێ دیار کر، دیتنا ڤی شوونواری، وێ راستیێ ئیسبات دکە کو “ئەم بەشەکێ گرینگ ژ رەسەنی، شارستانی و کووراھیا دیرۆکی یا مرۆڤاھیێ پێک تینن”.
ئیرۆ شەمبیێ 17 خزیرانا 2023، پارێزگارێ سلێمانیێ ھەڤال ئەبووبەکر راگھاند، تیمەکا زانینگەھا ریدینگ یا بریتانی ب ھەماھەنگیا لگەل رێڤەبەریا شوونواران یا سلێمانیێ، جھەکی دیرۆکی دیتنە، کو دیرۆکا وێ ڤەدگەرە 11 ھەزار و 500 سالان بەرێ.
ئەو شوونوارێ دیرۆکی، دکەڤە ھەمبەر شکەفتا زەرزێو و قژپاپان ل سەر چەمێ رەزان، ل سینۆرێ پارێزگەھا سلێمانیێ. ھەڤال ئەبووبەکر دەستنیشان کر، نە تەنێ ئەڤ جھێ کو شوونوارێ دیرۆکی ھات دیتن، ھەموو کوردستانا مەزن بگەرن، ب شوونوارێن وسا تژییە و جھێ یەکەمێ دەرگووشا مرۆڤاھیێیە.
دیتنا ڤی شوونواری وەک پارێزگارێ سلێمانیێ ھەڤال ئەبووبەکر دیار دکە، وێ راستیێ ئیسبات دکە کو “ئەم بەشەکێ گرینگ ژ رەسەنی، شارستانی و کووراھیا دیرۆکی یا مرۆڤاھیێ پێک تینن”.
