جیگرێ وەزیرێ دەرڤە یێ سووریێ دبێژە، “واشنگتۆن زوو یان دەرەنگ دێ ژ سووریێ دەرکەڤە و وێ دەمێ دۆسیەیا کوردی دێ ب ھێسانی بداوی ببە.”
جیگرێ وەزیرێ دەرڤە یێ سووریێ ئەیمەن سۆسان ژ بۆ کەنالا “RT” یا رووسی راگھاند، “کورد بەشەک ژ تەڤنا مە یا نشتمانی نە و ھەر دیالۆگەک لگەل وان، دڤێت د بن بانێ یەکتیا سووریێ و گەلێ وێ دە پێک بهێت.”
سۆسان گۆت ژی: “واشنگتۆن زوو یان دەرەنگ دێ ژ سووریێ دەرکەڤە و وێ دەمێ دۆسیەیا کوردی دێ ب ھێسانی بداوی ببە.”
ھەر وھا گۆت: “واشنگتۆن کار ژ بۆ ئاستەنگکرنا بجھکرنا ئارامیێ ل سووریێ دکە.”
ئەڤ داخویانیا جیگرێ وەزیرێ دەرڤە یێ سووریێ ئەیمەن سۆسان د دەمەکێ دە یە، دوھی 20ێ خزیرانا 2023 گەرا بیستەمین یا جڤینێن ئاستانایێ یا ل سەر ئاستا جیگرێن وەزیرێن دەرڤە یێن ترکیێ، ئیران، رووسیا و سووریێ، ل سەر دۆسیا سووریێ دەست پێ کر و بریارە ئیرۆ ژی بەردەوام بە.
ھەر د ڤێ دەربارێ دە ژی جیگرێ وەزیرێ دەرڤە یێ رووسیایێ میخائیل بۆگدانۆڤ راگھاندبوو، پرسا چارەسەرکرنا پرسگرێکا کوردی ل سووریێ، ژ بۆ ئامەریکایێ نە گرنگە و ئەو رێ نادە ھەڤپەیمانێن خوە یێن کورد دانووستاندنان لگەل شامێ بکن.
بۆگدانۆڤ گۆتبوو ژی: “ئامەریکی پشتگریا چەند رێخستنێن کوردان یێن وەکە دبێژن نیڤ-دەولەتەک ئاڤا کرنە، دکن. ئەڤ یەک ژی ب تەمامی نایێ قەبوولکرن.”
