فەرماندارێ گرووپا ڤاگنەرێ یەڤگێنی پرگۆژن دبێژە، “ئەم دێ د دەمەکە نێزیک دە سەرۆکەکی نوو ژ بۆ رووسیایێ ھلبژێرن و سەرۆکێ نھایێ رووسیایێ ڤلادیمێر پوتتن ژ کار دوور بخن.”
پشتی کو سەرۆکێ رووسیایێ ڤلادیمێر پوتین د گۆتارەکێ دە ل کۆشکا کرەملینێ راگھاند، گرووپا ڤاگنەر خیانەت ل گەلێ رووسیایێ کریە و دڤێت ب ئاوایێ ھەری توند بهێن سزادان، فەرماندارێ گرووپا ڤاگنەرێ یەڤگێنی پرگۆژن د داخویانیەکێ دە بەرسڤا پوتین دا و گۆت: “رێیا کو سەرۆکێ رووسیایێ ڤلادیمێر پوتین دایە بەر خوە، شاشە.”
یەڤگێنی پرگۆژن د داخویانیا خوە دە گۆتارا پوتین وەک “بێھێڤیبوون” ب ناڤ دکە و دبێژە، پوتین د دەمەکە نێزیک دە نەچار دبە کو دەست ژ پۆستێ خوە بکشینە ژ بەر ڤێ رێیا شاش کو دایە بەر خوە.
ئیرۆ شەمبیێ 24 خزیرانا 2023، سەرۆکێ رووسیایێ ڤالدێمیر پوتین د گۆتارەکێ دە کو ل کۆشکا کرملینێ پێشکێش کر، بەرسڤا گەفێن فەرماندارێ گرووپا ڤاگنەرێ یەڤگێنی پرگۆژن دا و گۆت: “ئەم سەرخوەبوون و نەتەوەیا خوە دپارێزن، ئەو پارێزگاریا وێ یەکێ دکن کو ئەم رووسیا نە. ئەڤ رەوشا کو نھا ئەم تێ رە دەرباس دبن، پێویستیا وێ ب ھەولا ھەموو ئالیان ھەیە. دڤێت ئەم دەست وان مژاران بەردن کو وەلاتێ مە لاواز دکن.”
ڤلادیمێر پوتین دبێژە، گرووپا ڤاگنەرێ ب پشتەڤانیا ھەژمارەک وەلاتان دخوازە وەلاتێ خوە لاواز بکە و دبێژە: “گرووپا ڤاگنەر دخوازە وێ سەرکەفتنا مەزنا ل ئوکراینایێ ھاتیە بدەستخستن، ژناڤ ببە.”
دەرەنگێ شەڤا ئینێ 23 خزیرانا 2023، فەرماندارێ گرووپا ڤاگنەر یەڤگێنی پرگۆژن د تۆمارەکا دەنگی دە ب فەرمی شەرێ دژی ئارتێشا رووسیایێ راگھاندیە و دیار دکە کو ھەژمارا وان 25 ھەزار کەسن و دخوازن گەلێ رووسیایێ ئازاد بکن ژ ڤێ سیستەما ل مۆسکۆیێ حکوم دکە.
