ئیسرائیلێ ب مووشەکان هن خالێن دن ل دەردۆرا باژارێ حومسێ کرن ئارمانج و ژێدەرەکی لەشکەرییێ سووری ژی دبێژە، زیان تەنێ مادی بوونە.
ئاژانسا فەرمی یا نووچەیان یا سووریێ «سانا» ل سەر زارێ ژێدەری لەشکەری راگهاند، ئیسرائیلێ ئیرۆ دەمژمێر 12:20 ژ ئالیێ باکورێ بەیرووتێ ڤە ئێریشەکە ئاسمانی پێک ئانی و هن خالێن ل دەردۆرا حومسێ کرن ئارمانج.
وی ژێدەری گۆت ژی، سیستەما بەرەڤانیا ئاسمانی یا سووریێ رووبروویی مووشەکێن ئیسرائیلێ بوو و زیان تەنێ مادی بوون.
ژ ئالیێ خوە ڤە، رەوانگەها سووری یا مافێن مرۆڤان دیار کر، دەڤەرا کو هاتیە ئارمانجکرن، وەک دەڤەرەکە میلیشیایا حزبوللا یا لوبنانی تێ زانین و ئەگەر هەیە کۆمگەهێن وێ میلیشیایێ لێ هەبن.
ژ دەستپێکا کریزا سووریێ ڤە، هەر جار ئیسرائیل ئێریشی بارەگەهێن ئارتێشا سووریێ و میلیشیایێن سەر ب ئیرانێ ڤە دکە. ئیسرائیل سووریێ تۆمەبار دکە کو ئەو رێ ددە هێزێن سەر ب ئیرانێ ڤە ژ ناڤا سووریێ ڤە ئێریشی ئیسرائیلێ بکن.
