پشتی ھلبژارتنا ل ترکیێ و باکورێ کوردستانێ رەوشا ھەدەپێ گەلەک دهێت گۆتوبێژ کرن. تایبەتی د ناڤا بنگەھێ ھەدەپێ دە جارا یەکەمە ب دەنگەک بلند ھندەک کەس رەخنا دکن و د ناڤا خوە دە بەحسا خەلەتی و سیاسەتا ھەدەپێ یا چەوت دکن. د ناڤا هەدەپێ دە ھەری زێدە رەوشا سەلاحەدین دەمیرتاش دهێت گۆتوبێژ کرن و گەلەک کەس د ناڤا هەدەپێ دە دەمیرتاش وەکە سەرۆکێ خوە قەبوول دکن. ھەتا د دەمێن داوی دە، ئالیگر و ھەڤالبەندێن هەدەپێ ئیدیعا دکن کو باندۆرا دەمیرتاش د ناڤا هەدەپێ دە ژ یا ئۆجالان و قەندیل پێترە.
سەلاحەدین دەمیرتاش گەلەک جارا ژ بۆ ھندەک ھەلوەستێن خوە ژ ئالیێ ئۆجالان و قەندیل ڤە ھاتیە رەخنەکرن. ھەتا د ھەڤدیتنێن ئیمرالیێ د دەما “پێڤاژۆیا چارەسەریێ” دە ئۆجالان بالا دەمیرتاش دکشینە و ژێرە دبێژە: تو ھژ لیدەرتیێ دکی لێ ھاژ خوە ھەبە تو ژی وەک ن.تاش و ئۆ.ئۆجالان نەکە.”
ژ ئالیەک دن ڤە دەمیرتاش گەلەک داخویانی ژ دەرڤەی دیتنا قەندیل دانە و ئەڤ یەک بوویە سەدەما بەرتەکا قەندیل ل ھمبە دەمیرتاش. د رۆژا 26/4/2023 دەمیرتاش د داخویانیەکێ دە ژ بۆی پۆلەتیکۆ ئەورۆپا دبێژە: “ئەم خوە وەک پێکھاتەیا سیاسییا پەکەکێ ب ناڤ ناکن، ژ بەر کو ئەم نە وسا نە. ئەم ب چ ئاوایی پشتگرییێ نادن بکارئانینا توندوتیژیێ و رێبازێن چەکداری.
دەما دەمیرتاش ڤان داخویانیا ددە، بەرپرسێن هەدەپێ ژی تێخە تەنگاسیێ دە.
دەما چالاکیا چەکدارێن پەکەکێ ل مەزتلیا مەرسینێ ل ھمبەر ئاڤاھیا مالا پۆلیسا پێکھاتی، دەمیرتاش ب توندی ئەڤ چالاکی رەخنە کربوو. لێ د جھ دە ھەم ژ ئالیێ قەندیل ڤە و ھەم ژی ژ ئالیێ باسکێ چەکداری یێ پەکەکێ ھەپەگێ ڤە ب توندی ھاتبوو رەخنە کرن، ھەتا ھەردو ئالیان ژی ژ رەخنەیان وێدەتر سڤکاتی ب دەمیرتاش کرن.
مالپەرا لێکۆلین د نڤیسەکا خوە دە دگۆت کو، “دەمیرتاش چ جارا نەبوویە کەسەک شۆرەشگەر، ئەو ب تەنێ د ناڤا دەردۆرەک شۆرەشگەردە بوویە.” ھەروەھا ھەمان مالپەرێ دگۆت کو؛ “دەمیرتاش ھەولددە خوە د چاڤێ جەهەپێ دە شرین بکە.”
ژ ئالیەک دن ڤە، پشتی ھەپەگێ داخویانیەکی دە ل ئێریشا مێرسینێ خوەدی دەرکەتی بوو و پەسنێ ڤێ ئێریشێ ددا. لێ پەکەکێ ژ پەیاما دەمیرتاش و هەدەپێ عاجز ببوو.
ب ئاوایەکی د داخویانیا خوە دە بالا ھەردو ئالیان کشاند و گۆتبوو: “بلا کەس نە ل بەندێ بە کو چەکدارێن فەدایی یێن ئاپۆ ب رەنگەکی جودا تەڤبگەرن. یێن کو زماندرێژیێ ل ڤێ چالاکیا ب ھەیبەت دکن، بەریا ھەر تشتی بلا بالا خوە بدن سەر ئێریشێن ب چەکێن کیمیەوی یێن رەژیما قرکەرا فاشیستا ئاکەپێ-مەھەپێ یێن ل دژی ھێزێن مەیێن گەریلا. یێن کو بکارئانینا چەکێن کیمیەوی ژ ئالیێ رەژیما فاشیست ڤە شەرمەزار ناکن، فەدایێن کو ژ بۆ پاراستنا نرخ و گەلێ کورد خوە فەدا دکن ب زمانێ دژمن شەرمەزار دکن. ئەڤ نێزیکاتی تەنێ ب تەپساندنێ دکارە بێ ڤەگۆتن. ھەڤرێیێن مەیێن کو ژ بۆ رێگریێ ل قرکرنا گەلێ کورد بگرن خوە فەدا دکن، نرخێن مەیێن ھەری پیرۆزن. یێن کو زماندرێژیێ ل ڤان نرخان دکن، دڤێت بزانبن کو نە گەلێ مەیێ وەلاتپاێز نە ژی ھەقیقەتا فەدایێن مە تەمسیل ناکن.”
سەلاحەدین دەمیرتاش پشتی داخویانیا هەپەگێ ل سەر حەسابا خوە یا تویتەرێ داخویانیەک دا و ئەڤ داخویانی وەک بەرسڤا ھەپەگێ ھاتە نرخاندن.
دەمیرتاش گۆت: “ئیسرارا د سیاسەتا دەمۆکراتیک و سیاسەتا ئاشتیێ دە ژ بۆ مە پرەنسیبن. دڤێت کەس ل بەندێ نەبە کو ئەم گاڤەکێ پاشدە باڤێژن. ئەم دێ د بن ھەر شەرت و مەرجی دە پرەنسیبێن خوە بپارێزن و ب ھەموو دەرفەتێن خوە داخوازا چارەسەریا دەمۆکراتیک و ئاشتیێ بینن زمان. ئەم دێ فاشیزمێ تونە بکن و تەقەز ب سەر بکەڤن.”
ھەروەھا د پێڤاژۆیا ھلبژارتنان دە دەمیرتاش گەلەک داخویانی دان و ھندەک نڤیس ژی نڤیساندن. دەمیرتاش تویتەک بەلاڤکر و تێ دە دگۆت: “ژ بۆ گوھارتنا مەزن ئامادەبن. بلا ھەرکەس دەستبدە ھەڤ و ل تەنشتا ھەڤدو بسەکنە. پیڤانا مەیا ھەڤبەش “کۆمارا دەمۆکراتیکە”. مالا مە یا ھەڤبەش ترکیایە. دەولەتا مەیا ھەڤبەش کۆمارا ترکیێ یە.
د راستیا خوە دە دڤێت ھەلوەستا دەمیرتاش یا کوردەواری باش بێ نرخاندن، دەمیرتاش ل سەر خەتەک نەتەوییە، یان پێتر کەسایەتەک چەپە و کەمالیستە.؟ نابە ئەڤ بابەت ب هەستان بهێت نرخاندن. پێدڤیە ئەڤ یەک ژ ئالیێ بنگەھا هەدەپێ یا کو پرانی خوە کورد دبینن و ھەولددن پرسا کورد د ناڤا هەدەپێ دە بدن پێش ڤە بێ نرخاندن.
رۆژا 16/11/2022 دەزگەھێ لێکۆلینێ مەترۆپۆڵ، ل ترکیێ راپرسینەک بالکێش چێکر. راپرسینا ڤێ جارێ د دەربارێ باندۆرا عەبدوللا ئۆجالان و سەلاحەدین دەمیرتاش ل سەر هەدەپێ بوو. لێ د راپرسینێ دە پرس ژ دەنگدەرێن پارتیێن ترکا ھاتە پرسین. پرس ژ دەنگدارێن، ئاک پارتیێ، جەهەپێ، IYI پارتی، مەھەپە، پارتیا سەعادەت و دەڤا ھاتە کرن.
پرس ب ڤی ئاوایی بوو:
گەلۆ ل سەر دەنگدارێن هەدەپێ باندۆرا ئۆجالان یان یا دەمیرتاش پێترە؟
د راپرسینێ دە 21.2% گۆتن عەبدوللا ئۆجالان و ژی 51.1% گۆتن سەلاحەدین دەمیرتاش. ژ سەدی 27.7% کەسێن کو بەشداری راپرسیێ بوون، گۆتن ئەم نزانین.
ژ ئالیەک دن ھەمان پرس ژ دەنگدەرێن هەدەپێ ب خوە ژی ھاتە پرسین.
دەنگدارێن هەدەپێ؛ 22.1% دبێژن ئۆجالان و 75.2% ژی دبێژن دەمیرتاش.
ڤەکری دخوەیە کو باندۆرا دەمیرتاش ل سەر هەدەپێ ژ یا ئۆجالان پتر ھەیە. رەوشا دەمیرتاش یا کو دبێژە کو وی دەڤ ژ سیاسەتا چالاک بەردایە ژی بابەتەکێ دن یێ پرسا د ناڤا هەدەپێ دەیە.
پشتی کو ھەدەپێ د ھلبژارتنێن بۆری دە ھێز و خوین وندا کر، داخویانییەک دا و رەخنە ل خوە و پارتییا خوە کر. دەمیرتاش لێبۆرینا خوە ژ کوردان خوەست، ل سەر مەدیایا جڤاکی داخویاند کو وی دەست ژ سیاسەتا ئەکتیف بەردایە و وھا گۆت:
“ئەز ل سەر ناڤێ خوە ژ دل لێبۆرینێ دخوازم کو مە نەکاری سیاسەتەکا هەژی گەلێ خوە بدن مەشاندن. ئەز سۆز ددم کو ب خەباتێن خوەیێن پراکتیکی ڤان کێماسییان نەهێلم. ھەر وھا سپاسییا رەخنەیێن ئاڤاکەر یێن کو ل من ھاتن گرتن دکم. ئەز دێ ھەول بدم مفا ژێ وەرگرم. ئەز ژی دێ وەک ھەموو ھەڤالێن خوەیێن ل گرتیگەھێ تێکۆشینا خوە ب بەرخوەدانێ بمەشینم، ئەز د ڤێ قۆناغێ دە دەست ژ سیاسەتا ئەکتیف بەرددم. ب ھێڤییا رۆژێن ئازاد”.
داخویانییا دەمیرتاش وەک بۆمبەیەکێ کەت رۆژەڤا سیاسی یا کورد، ترکیێ و جیھانێ. دهێت گۆتن کو گەلەک ژ رێڤەبرێن ناڤا ھەدەپێ گرینگی نەدانە داخویانییا دەمیرتاش و دبێژن “دەست ژێ بەردانا سیاسەتا ئەکتیف ژ لایێ دەمیرتاش مژارەکە کو دڤێت نەیێ مەزنکرن. سیاسەتمەدارێن دنێن د گرتیگەھێ دە ب تویت و داخویانییان سیاسەتێ ناکن. رەوش ب تەڤاھی نۆرمالە و د ناڤا پارتییێ دە دەمیرتاش چ بەرپرساتی نینە.”
د ڤێ دەربارێ دە کەسێن نێزیکی دەمیرتاش دبێژن: “دخوازن دەمیرتاش بێدەنگ بکن. پێشنیازێن وی نایێن گوھداریکرن. ب سەر دە ژی دەما کو ئەنجامێن ھلبژارتنێ ب ڤی رەنگی ھاتن، ھەول دان کو دەمیرتاش بەرپرسیار ببینن. د ناڤا ھەدەپێ دە کەسێن کو دخوازن دەمیرتاش ژ گرتیگەھێ دەرنەکەڤە ژی ھەنە.”
رەوشا دەمیرتاش و بەردەوامیا ھەلوەستێن وی، پتر د دەما ھلبژارتنێن شارەداریان دە دهێت تێگەهشتن. کا گەلۆ دێ دەمیرتاش وەک ھلبژارتنێن سەرۆککۆماریێ یێن پارلەمەنتۆیا ترکیێ چالاک بە یان دێ بێدەنگ بمینە و نابە خوەدی ھەلوەست؟ ئەڤ یەک دێ ھەمان دەمی دە ببە بەرسڤا رەوشا پێشەرۆژا هەدەپێ ب خوە ژی. ژ ئالیەک دن ڤە، وەک تێ زانین پەکەکە ب ناڤێ پارتیا چەپا کەسک کەتە ھلبژارتنێن پارلەمەنتۆیا ترکیێ دە. گەلۆ د پاشەرۆژێ دە دێ د چ قالبی دە بە ژ نھا ڤە نایێ زانین. لێ د ناڤا پارتیا چەپا کەسک دە، حەژێکەرێن ئاپۆ گەلەکترن و پرانی ژی چەپێن توندرەون.
بابەتەک دن ھەیە بەلکی نە گەلەکی گرینگە ژی (!) لێ دهێت زانین کو برایێ سەلاحەدین یێ مەزن ئانکو نورەدن دەمیرتاش ل قەندیلێ یە. گەلۆ باندۆرا ڤێ یەکێ ل سەر سەلاحەدین چیە؟
5/7/2023
رۆژەڤاکورد
