مەدیایا ترکیێ ئیرۆ رۆژا چارشەمبێ 5/7/2023 ژ سەر زارێ ئاژانسا ئیستخباراتا ترکیێ (میت) کوشتنا کەسەکی ب ناڤێ جەلال کایا ل سلێمانیێ کو پلانسازێ ئێریشا تەرۆریستی یا سالا 2019 بوو ل کافەیا ھۆقەبازا ھەولێرێ راگھاند.
د ڤێ دەربارێ دە ئەندامێ کۆمیتەیا ناڤەندییا پارتیا دەمۆکراتا کوردستانێ (پەدەکێ) عەلی عەونی دبێژە “ئەز نزانم چاوا وان ئەڤ بەرپرسێ پەکەکێ کوشتیە، لێ پرس ئەڤە، پەکەکە ل سلێمانیێ چ دکە و چما ل سلێمانیێیە؟ میتێ چاوا خوە گھاند وی کەسی؟”
ھەروھا عەلی عەونی دبێژە: “نە رەوایە کو پەکەکە ل سلێمانیێیە و بوویە مەترسی ل سەر خەلکێ سڤیل، سەردەستی و بالداریا پەکەکێ ژ ئالیێ یەنەکێ ڤە و کوشتنا کادرۆیێن پەکەکێ ل ناڤچەیێن د بن کۆنترۆلا ھێزێن ئاسایشا یەنەکێ دە، پرسگرێکێن مەزن ژ بۆ کوردستانێ چێکریە. ئەڤە فشارێ ل سەر مە چێدکە. پشترە بەهانەیان ددن ترکیێ و و ترکیێ دکشینن ناڤ ئاخا ھەرێما کوردستانێ و پشترە ژی مە ب کاشکرنا ترکیێ تۆھمەتبار دکن.”
ئەندامێ کۆمیتەیا ناڤەندییا پەدەکێ پێویست دبینە کو پەکەکە و ترکیە رەوشا ھەرێما کوردستانێ ل بەر چاڤان بگرن و ھەرێما کوردستانێ نەکن قادا پرسگرێکان.
