ل سوێدێ ژ بۆ کەسەکی کو د مەها چلەیێ ئیسال دە هاتبوو گرتن ب سووچا «فینانسەکرنا په‌كه‌كێ» جارا یەکەمین جەزایا گرتیگەهێ هات دایین. پارێزەرێ وی دیار کریە کو ئەو دێ ل دژی بریارا دادگەهێ نەرازیبوونا خوە نیشان بدن.
دادگەها هەرێما ستۆکهۆلمێ جارا یەکەمین ژ بۆ کەسەکی کو ب سووچا فینانسەکرنا په‌كه‌كێ دهات دارزاندن 4 سال و 6 مەهـ جەزایێ گرتیگەهێ دا و داخواز کر کو ئەو کەس بێ دەرسینۆرکرن. ئەڤ بریارا دادگەهێ ژ بۆ ئەندامتیا ناتۆیێ یا وی وەلاتی وەک گاڤەکە ئەرێنی هات نرخاندن.
ناڤێ وی کەسێ کو هاتیە جەزاکرن نەهاتیە ئەشکەرەکرن لێ تێ زانین کو 40 سالی یە و کوردەکی ژ باکورێ کوردستانێ یە. ئەو کەس د مەها چلەیا ئیسال دە ژ بەر ل پێشیا خوارنگەهەکێ ب چەکێ گوللـە بەردابوو هاتبوو گرتن لێ پشترە ژ ئالیێ دادگەهێ ڤە ب سووچا کو «ب گەفا چەکی ژ کارسازەکی کورد بۆ په‌كه‌كێ داخوازا پەرەیان کری یە» هاتیە دارزاندن.
پارێزەرێ وی کەسی ئیلهان ئایدن ژ ئاژانسەکە فرانسی رە ئاخڤیە و گۆتیە کو ئەو وان ئیدیعایان قەبوول ناکن و دژی بریارێ نەرازیبوونا خوە دێ نیشان بدن.
1ێ خزیرانا ئیسال ل سوێدێ یاسایا رووبرووبوونا تەرۆرێ یا نوو هاتبوو جیبجیکرن. ل گۆر ڤێ یاسایا نوو بۆ کەسێن «بەشداری چالاکیێن تەرۆرێ» ببن د ناڤبەرا 4 هەتا 8 سال جەزایێ گرتیگەهێ، بۆ «سەرۆکاتیا رێخستنا تەرۆرێ» ژی هەتا 25 سال جەزایێ گرتیگەهێ تێ داین.
د 11 و 12ێ تەمووزێ دە دێ ل لتڤانیایێ لووتکەیا ناتۆیێ بێ کرن و یەک ژ رۆژەڤێن جڤینێ ئەندامتیا سوێدێ یا ناتۆیێ یە.
