وەزیرێ سامانێن سرووشتی یێ ھەرێما کوردستانێ ب وەکالەت کەمال محەمەد سالح راگھاند، سەرۆککۆمارێ ترکیێ رەجەب تەییب ئەردۆگان ژ بۆ گۆتووبێژکرنا پرسا ھناردەکرنا پەترۆلا ھەرێما کوردستانێ سەردانا ئیراقێ دکە.
کەمال محەمەد سالح ئیرۆ 10 تیرمەھا 2023 راگھاند، ژ بۆ دەستپێکرنا ھناردەکرنا پەترۆلا کوردستانێ، حکوومەتا ھەرێما کوردستانێ لگەل وەزارەتا پەترۆلا ئیراقێ و سۆمۆ گرێبەستەک ھاتیە ئیمزەکرن، ئەڤ پرسگرێک ل سەر ئاستا بلند و د دەما سەردانا سەرۆککۆمارێ ترکیێ بۆ ئیراقێ دە چارەسەر دبە.
د بەشەکا دنا ئاخافتنا خوە دە گۆت ژی: ژ سەدی 70 کار ل سەر پرۆژەیاسایا نەفت و گازێ تەمام بوویە و د دەمەک نێزیک دە شاندا حکوومەتا ھەرێما کوردستانێ دێ سەردانا بەغدایێ بکە.
ئەڤ یەک د دەمەکێ دەیە، وەزیرێ پەترۆلا ئیراقێ ھەیان عەبدولغەنی بەری چەند رۆژان راگھاندۆبوو، وان ژ 13 گولانا بۆری ڤە دەستھلاتدارێن ترکیێ ب دەستپێکرنا پرۆسەیا ھناردەکرنا پەترۆلا کوردستانێ ئاگاھدار کرن.
د 25 ئادارا 2023 دە، ب بریارا دادگەھا ناڤدەولەتییا پاریسێ، ھناردەکرنا پەترۆلا ھەرێما کوردستانێ و کەرکووکێ ھاتبوو راوەستاندن. د 4 نیسانا 2023 دە ژی، سەرۆکوەزیرێ ئیراقێ محەمەد شیاع سوودانی و سەرۆکوەزیرێ ھەرێما کوردستانێ مەسروور بارزانی ل بەغدایێ رێکەفتنەک ئیمزە کرن کو ھناردەکرنا پەترۆلا ھەرێما کوردستانێ ژ نوو ڤە بێ دەستپێکرن.
