بالافرێن شەر یێن ترکیێ سینۆرێ دهۆکێ بۆمبەباران کرن
بالافرێن شەر یێن ترکیێ ئیرۆ چار جهـ ل هەر دو چیایێن گارە و مەتینی یێن ل پارێزگەها دهۆکێ یا باشوورێ کوردستانێ بۆمبەباران کرن.
نشتەجهەکی گوندێ بەلاڤەیێ سەر ب ناڤچەیا ئامێدیێ ڤە، یێ ب ناڤێ فایەق بیرکاهنی ژ رووداوێ رە راگهاند، ترکیێ سێ جهـ ل دەڤەرا بەرێ گارە و جهەکی دن ل چیایێ مەتینی بۆمبەباران کرن.
فایەق بەلاڤەیی ڤیدیۆیا بۆمبەبارانا ئیرۆ ژ رووداوێ رە شاندیە و دبێژە، بلنداهیێن ل دەردۆرا گوندێن گرگاش و سپیندارێ و دەڤەرا زێبار ل چیایێ گارە و هەروه‌ها لووتکەیا چیایێ مەتینی ل نێزیک گوندێ بەلاڤە ئیرۆ ژ ئالیێ بالافرێن ترکیێ ڤە هاتن بۆمبەبارانکرن.
ب گۆتنا وی کەسی، ژ بەر بۆمبەبارانان، خەلکێن هەرێمێ گەلەک ترسیانە.
تێکلداری زرارێن بۆمبەبارانا ئیرۆ ژی، وەلاتیێ ناڤبۆری دیار کر، جهێن کو هاتنە بۆمبەباراکرن، 5 هەتا 7 کیلۆمەترەیان ژ گوندان دوورن و ئەو جهن کو هاتنووچوونا بۆ وان هاتیە قەدەخەکرن، لەورا زرارێن بۆمبەبارانێ نایێ زانین.
ئەو نێزیکی مەهەکێ یە کو ترکیێ بۆمبەبارانا ل سەر سینۆرێن ناڤچەیێن ئامێدی و ئاکرێ زێدەتر کریە.
بالافرێن شەرێن ترکیێ، ب سه‌ده‌ما هەبوونا بنکە و بارەگەهێن په‌كه‌كێ رۆژانە چیایێن مەتین و گارە ل ئامێدیێ و دەڤەرا زێبار ل ناحیەیا دینارتە یا سەر ب ناڤچەیا ئاکرێ ڤە بۆمبەباران دکن.
