یەنەکە ل کەرکووکێ ژ بەر کو نەوێرە ب تەنێ بەشداری ھەلبژارتنێ ببە، ل ئالیەکی ڤە داخواز ژ ئالیێن کوردستانی دکە لیستەیەکی ھەڤبەش پێکبینە، ژ ئالیێ دن ڤە ژی ھەوارا خوە دبە بەر گرۆپەکێ سەر ب پەکەکێ و داخوازا ھەڤپەیمانیێ لێ دکە.
ل گۆر زانیاریان شاندەیەکی مالبەندا دو یا رێخستنا یەنەکێ ل کەرکووکێ، سەردانا تەڤگەرا ئازادییا کوردستانێ کر، کو گرۆپەکێ سەر ب پەکەکێ یە و ل کەرکووکێ چالاکیا وان ھەیە. د وێ سەردانێ دە یەنەکێ داخواز ژ وێ گرۆپێ کریە، ل کەرکووکێ ب یەک لیستەیێ بەشداری بکن. پەکەکێ بەرێ ژ بۆ ھەلبژارتنێن ئەنجوومەنا نوونەرێن ئیراقێ د چەند جیھەکان دە پشتەڤانی ل بەربژێرێن یەنەکێ دکر، لێ چ جیھەکی ژی بەربژێرێن یەنەکێ دەرنەکەتن. ئەڤ ژی بەلگەیە ل سەر وێ یەکێ کو یەنەکێ و پەکەکێ ت پێگەھەکی وان ل کەرکووکێ نەمایە.
ل گۆر زانیاریان پرانیا ئالیێن کوردستانێ ل گەل وێ یەکێ دە نینن، کو ل گەل یەنەکێ ب یەک لیستەیێ بەشداری ھەلبژارتنێ ببن، سەدەم ژی بوویەرێن پشتی 16 ئۆکتۆبەرا 2017ێ یێن خیانەتا یەنەکێ یا ل کەرکووکێیە.
د ڤێ دەربارێ دە نڤیسکار و رۆژنامەڤان سوورە مەرگەیی راگەھاند: “یەنەکێ چ ئالیەک نەمایە کو داخواز لێ نەکربە و ھاتیە ل کەرکووکێ دخوازە پەکەکێ رازی بکە، کو ببە ھەڤپەیمانێ وێ، لێ خەلکێ سینۆرێ کەرکووکێ ژ پەکەکێ ژی عاجز بوونە و ئالیگرێن وان تنە. ژ بەر وێ یەنەکە ل سەر ھەسپێ سکتی پشک داڤێژە، ژ بەر کو یەنەکێ د ھەلبژارتنا بۆری دە چەند سوود ژ دەنگێن پەکەکێ دیت، دێ ل کەرکووکێ ژی ھەر ھندە سوود ژ دەنگێن پەکەکێ ببینە.”
ھەروھا گۆت: “نھا یەنەکە دزانە ل کەرکووکێ رەوش باش نینە و پشتی خیانەتا 16 جۆتمەھێ گرسە و ئالیگرێن وێ ژێ قوتبوونە و ناچارە ژ بۆ خوە ل سەر لنگان بگرە ھەوار ھەوارێ بکە.”
