سندۆقا ئالیکاریا زارۆکان یا سەر ب نەتەوەیێن یه‌كبوویی (UNICEF) راگهاند، د شەش مەهێن یەکەمێن سالا 2023ێ دا، 289 زارۆکان دەما هەولدانا دەرباسبوونا دەریایا سپی ژ بۆ گهشتنا ئەورۆپایێ ژیانا خوە ژ دەست دانە.
ل گۆر داخویانیا ژ ئالیێ UNICEF ڤە هاتیە بەلاڤکرن، پێشەنگا جیهانی بۆ کۆچ و ئاوارەیان ڤێرا کناوس، ل باژارێ جنێڤێ یێ سویسرایێ، ل سەر مرنا زارۆکان ل دەریایا سپی، بۆ رۆژنامەڤانان ئاخڤی.
ڤێرا کناوس دیار کریە، د نیڤا یەکەم یا ئیسال دا 289 زارۆکان د رێ دا ژیانا خوە ژ دەست دانە و ئەڤ هەژمار ل گۆر سالا بۆری دو به‌رامبه‌ر لێ هاتیه، هەفتیانە نێزیکی 11 زارۆک ژیانا خوە ژ دەست دده‌ن.
کناوس بال کشاندیە سەر وێ یەکێ کو تەنێ د شەش مەهان دا فرۆکەیەکا پری زارۆک ژیانا خوە ژ دەست دانە، تەکەز کر کو ئەو ئێدی ل هەمبەر ڤێ یەکێ بێدەنگ نابن.
هەروها ڤێرا کناوس دەستنیشان کریە کو شەر و پەڤچوونێن هەرێمی و گوهەرینا کەش و هەوایێ، گەلەک کەسان کو پرانیا وان زارۆکن، نەچاری کۆچکرنا ب رێیا دەریایی و مەترسیدار کریە کو ژ باکورێ ئەفریقایێ بۆ ئەورۆپایێ درێژ دبە.
یونیسێفێ راگهاندیە، ژ بەر رزگارنەکرنا هەژمارەکا مەزن ژ زارۆکان ل ژێر پاشماهیێن کەشتیان یان ژی تۆمارنەکرن وان، وسا تێ تەخمین کرن کو هەژمارا زارۆکێن ژیانا خوە ژ دەست دانە گەلەک زێدەتر بیت.
ڤێرا کناوس تەکەزی ل سەر وێ یەکێ کریە کو پێویست بوو رێگری ل مرنا وان زارۆکان هاتبا گرتن و گۆت: «جیهان ب قەستی چاڤێ خوە ل بەر ڤان مرنان دگریت».
