ئاسایشا هەولێرێ 10 بازرگانێن مادەیێن هشبه‌ر گرتن
رێڤەبەریا ئاساییشا هەولێرێ د هەیاما دو رۆژێن بۆری دە، 10 تۆهمەتبار ب تۆهمەتا بازرگانیا مادەیێن هشبه‌ر گرتن.
ل گۆر زانیاریێن ک24ێ، د هەیاما دو رۆژان دە تیمێن رێڤەبەریا ئاساییشا هەولێرێ 10 کەس ب تۆمەتا بازرگانیا مادەیێن هشبه‌ر د دەما کرین و فرۆتنا مادەیێن هشبەر دە گرتن.
پەیامنێرێ ک24ێ دا زانین، یەک ژ وان تۆهمەتباران کو رووبروویی هێزێن ئاسایشێ بوو، پشترە ب هەڤاهەنگیا هێزێن ئەولەکاریا سۆرانێ هات گرتن.
گۆت ژی، هەژمارەک چەک، فیشەک، کریستال و تریاک، هەر وها پەرە و ئالاڤێن کو ژ بۆ کشاندنا مادەیێن هشبر دهاتن بکارئانین ب کەسێن بەرگومان رە هاتن دەستەسەرکرن.
ئەو تۆهمەتبار ل سەر فەرمانا دادوەرێ لێکۆلینا ئاساییشا هەولێرێ ڤە هاتنە گرتن و ل گۆر رێکارێن یاسایی یێن دادگەهێن هەرێما کوردستانێ دێ بێن جەزاکرن.
حکوومەتا هەرێما کوردستانێ ژ بۆ گرتنا بازرگانێن مادەیێن هشبه‌ر، دەست ب ئۆپەراسیۆنەکە مەزن کریە، د هەفتەیا بۆری دە 4 بازرگانێن مەزنێن مادەیێن هشبه‌ر ل دهۆک و زاخۆ گرتن.
ل گۆر ئامارێن رێڤەبەریا نەهیشتنا مادەیێن هشبه‌ر، د 5 مەهێن دەستپێکا ئیسال دە، 943 تۆهمەتبار هاتنە دەستبسەرکرن کو 367 کەس ژ وان بازرگانیا مادەیێن هشبه‌ر کرنە. هەر وها 679 کیلۆ حەب، 49 کیلۆ مادەیێن هشبەر و 2 هەزار و 860 شیت حەب ژی هاتن بدەستخستن.
ل گۆر ئامارێن کو بەری نها ک24 بەلاڤ کربوون، % 80 ژ بکارهێنەرێن مادەیێن هشبه‌ر ل هەرێما کوردستانێ تەمەنێ وان د ناڤبەرا 18 و 35 سالی دەنە، % 10 ژ بکارهێنەرێن مادەیێن هشبەر ژنن و % 4 ژی تەمەنێ وان د بن 18 سالیێ رەنە.
