رێڤەبەریا خوەسەر یا ل رۆژئاڤایێ کوردستانێ رادگه‌هینیت، پرۆژەیا وان ل باکورێ رۆژهلاتێ سووریێ نە جوداخوازە و ئه‌و بەشداری چ پرۆژەیێن پارچەکرنا سووریێ نابن.
كۆمیتا په‌یوه‌ندیێن دەرڤە یا رێڤەبەرییا خوەسەر ده‌ربارێ داخویانیا وەزارەتا دەرڤە یا سووریێ کو ل 18ێ تیرمەهێ ل دۆر سەره‌دانا شانده‌كێ فره‌نسی بۆ ده‌ڤه‌رێن باکور و رۆژهلاتێ سووریێ بەلاڤ کربوو، داخویانیەک بەلاڤ کر.
د داخویانیێ دا هاته گۆتن: «ئەم هەموو تاوانێن د داخویانیا وەزارەتا دەرڤە یا سووریێ دا هاتینە رەد دکه‌ین. د داخویانیا وەزارەتێ دا هاتە گۆتن ئەڤ پرۆژە، پرۆژەیەکێ جودابوونێ یە. لێ ئەم دیار دکه‌ین کو پرۆژەیا مە نەتەوەیی و سووری یە و چ په‌یوه‌ندییا خوە ب چ پرۆژەیەکێ ل دژی سووریێ، ئێكه‌تییا وێ و گەلێ وێ ڤه نینه».
رێڤه‌به‌ریا خوه‌سه‌ر گۆت: «ئەم بانگ ل شامێ دکه‌ین کو ده‌ست ژ ڤێ گۆتارێ بەردەت و هزر ل رەوشا سووریێ بكه‌ت و ژ وێ زهنیەتا خوە کو هێشتا چ پێشکەتن د رێڤەچوونا چارەسەریێ دا پێک نه‌هاتینه، دەرکەڤیت».
