پارتیا كاركه‌ران ژ ده‌ستپێكا ئاڤابوونا خوه زارۆكێن كوردان مه‌حكوومی قه‌ده‌را ره‌ش كرنه، مرنا ژ بۆی وه‌لات روومه‌ته خه‌لاته، لێ ئه‌ڤ پارتی روومه‌تا زارۆكێن كوردان د مرنا ژ بۆ ئاپۆ دا دبینه، دبێژه چ خه‌لات ب قاسی وێ مرنێ ب روومه‌تر نینه.
قادر 14 سالی بوو د ده‌ستپێكا بوهارا ته‌مه‌نا خوه ده ئه‌و و 9 هه‌ڤالێن خوه ل سه‌یرانێ بوون ده‌ما هاتن ره‌ڤاندن، 8 سالان د كابووسه‌كێ بێ داوی ده مابوو، پشتره ره‌ڤیا، وی بۆ «داركا مازی» چیرۆكا دل ب ئێش یا كوشتنا 9 رێهه‌ڤالێن خوه ڤه‌گێرا.
پاش ژیان كرنا 8 سالێن ئێش، ترس و نه‌خوه‌شیێ ئه‌و ره‌ڤیا
ره‌ڤاندنا زارۆكێن كوردان ژ هه‌ر چار په‌رچه‌یێن كوردستانێ، چاڤكانیا سه‌ره‌كه یا چێكرنا شه‌رڤانێن پارتیا كاركه‌رانه، پارتیێ د 40 سالێن رابووری ده ب ده‌هان هه‌زار زارۆك ره‌ڤاندنه، ب دارێ زۆرێ ته‌ڤلی ره‌فێن گه‌ریلا كرنه و به‌رێ وان ژ بۆی ئاپۆ دا نه مرنێ.
«داركا مازی» وورده‌كاریێن ته‌وانه‌كا دن یا ره‌ڤاندنا زارۆكێن كورد ژ هێلا په‌كه‌كێ ڤه ب ده‌ست خستن، یێك ژ قوربانیێن ڤێ چیرۆكا دل ب ئێش ب «قادر» تێ ناسكرن، رێخستنێ ئه‌و ل سالا 2014 ره‌ڤاند ل وێ ده‌مێ ئه‌و 14 سالی بوو، پاش ژیان كرنا 8 سالێن ئێش، ترس و نه‌خوه‌شیێ ئه‌و ره‌ڤیا، قادر ووسا چیرۆكا خوه و 9 رێهه‌ڤالێن خوه یێن ژ جزیرا بۆتان بۆ «داركا مازی» گۆت:
قادر دبێژه: «سال 2014 بوو، ئه‌ز و 9 رێهه‌ڤالێن خوه یێن خۆرت و كه‌چ ژ جزیرا باكورێ كوردستانێ ب ئارمانجا سه‌یرانێ ده‌رباسی عندیوه‌را ل رۆژئاڤا كوردستانێ بوون، ل وێ ده‌مێ سینۆر هاتبوون ڤه‌كرن و هه‌ر كه‌س ب هێسانی ژ ئالیێ تركیێ و باكورێ كوردستانێ ڤه ده‌رباسی رۆژئاڤا د بوو».
ئێدی نه‌ما هوون ڤه‌گه‌رن مالێ، ئێدی هوون چه‌كدارێن رێخستنێ نه
قادر ئاخافتنا خوه ده‌وام دكه: «پاش بۆرینا دو رۆژان ژ گهیشتنا مه بۆ عندیوه‌رێ دو ئۆتۆمۆبیلێن یه‌كینه‌یێن پاراستنا گه‌ل یه‌په‌گێ هاتن جه‌م مه و ژ مه ره گۆتن ئه‌مێ وه ببن جهێن خوه‌شتر و ل هه‌رێمێ ب گه‌رینن، لێ به‌لێ وه‌ختا بوویه شه‌ڤ ئه‌م ده‌رباسی سینۆرێ باشوورێ كوردستانێ كرن و برن چیایێ گاره».
قادر گۆت: «ل گه‌ل گهیشتنا مه بۆ چیایێ گاره، زارۆ و جوان گریان و خوه‌ستن وان ڤه‌گه‌رینن مالێن وان، لێ به‌لێ رێڤه‌به‌رێن پارتیێ ل وێ ده‌رێ ژ مه ره گۆتن ئێدی نه‌ما هوون ڤه‌گه‌رن، ئێدێ هوون چه‌كدارێن پارتیێ نه».
قادر د ده‌واما ئاخافتنا خوه ده دبێژه: «ژ ترسا پارتیێ و چه‌كدارێن وێ، زارۆكان ژ نه‌چاری قه‌بوول كر كو ببن چه‌كدار و ته‌ڤلی خولێن په‌روه‌رده‌هییا له‌شكه‌ری و ئیدۆلۆژی بوون، پشتره هه‌ر یێك ژ بۆی هه‌رێمه‌كه جودا تێ شاندن، من نه‌زانی هه‌ڤالێن مه ب كو ده‌رێ ده چوون، ئه‌ز ژی ده‌مه‌كێ ل گاره‌ی مام، من پڕ هه‌ول دان كو خوه بكوژم، من ب گرانی خوه بریندار كر، پشتره شاندم رۆژئاڤا كوردستانێ ژ بۆ كو ته‌ڤلی شه‌رێ ل دژی داعشێ ببم».
ئه‌م زارۆك بوون و رێخستنێ ئه‌م شاندن منبجێ كو ئه‌نییا هه‌ری دژوارا شه‌ر بوو
قادر دبێژه: «من ت ئاگاهی ژ هه‌ڤالێن خوه یێن ژ جزیرێ نه‌گرتن، هایا من نه‌بوو ئه‌و ب كو ده‌رێ ده چوون، ئه‌ز ژی د وێ ته‌مه‌نا بچووك ده شاندم منبجێ كو ئه‌نییا هه‌ری دژوار یا شه‌ر بوو».
ل منبجێ وه‌سایتا مه راستی ئێریشه‌كه داعشێ هات و ئه‌ز ب گرانی بریندار كه‌تم، ژ بۆ كو من ته‌داوی بكن، ئه‌ز شاندم شامێ، قادر گۆت نوشداران ل شامێ ژ من ره گۆ پێویسته ده‌ستێ ته یێ ئالیێ چه‌پێ ل ئه‌ورۆپایێ وه‌ره ته‌داوی كرن، ئه‌گه‌ر نا ئه‌مێ ناچار ببن ژێكن».
قادر گۆت: «من ل وێ ده‌مێ ژ به‌رپرسێ پارتیێ یێ مالا برینداران خوه‌ست كو من بشینن ئه‌ورۆپایێ، لێبه‌لێ وی ئه‌ڤ داخوازا من ب دژواری ره‌د كر، لوما ئه‌م ل ور ب شه‌ر چوون و ژ به‌ر ڤێ ئه‌ز بۆ ده‌ما 4 سالان خستم زیندانا حه‌سه‌كێ».
ل ده‌ستپێكا 2023ێ ژ رێزێن پارتییا كاركه‌ران ره‌ڤیام
قادر دبێژه: «ئه‌ز ل ته‌باخا سالا 2022 ژ زیندانێ سه‌ربه‌ست هاتم به‌ردان و پشتره برم مالا برینداران ل حه‌سه‌كێ و ل ده‌ستپێكا ئیسال 2023 ژ ناڤ رێزێن پارتیێ ره‌ڤیام».
قادر ل داوییا ئاخافتنا خوه ده‌ر بارێ رێهه‌ڤالێن خوه یێ ژ جزیرێ كو ب هه‌ڤره ده‌رباسی عندیوه‌رێ ببوون دبێژه: «من وێنه‌یێن پرانییا وان ل ستێرك تی ڤی یێ دیتن، پارتیێ هه‌موو د وێ ته‌مه‌نا بچووك ده دا نه كوشتن و وه‌كه شه‌هید راگهاندن، ت كه‌س ژ وان د ژیانێ ده نه‌ما یه».
پارتییا كاركه‌ران زارۆكێن كوردان مه‌حكوومی مرنا ژ بۆ ئاپۆ كرنه
ته‌وانا ره‌ڤاندنا قادر و رێهه‌ڤالێن وی، یه‌كه ژ هه‌زاران ته‌وانێن هه‌مئاوا یێن كو پارتییا كاركه‌ران ژ سالا 2014 ڤه ئه‌نجام داین، هه‌یا رۆژا مه یا ئیرۆ ژی ئه‌ڤ پارتی رۆژانه وێنه‌یێن كۆمێن زارۆك و جوانێن كوردان پارڤه‌دكه، زارۆكێن كو د سالێن به‌رێ ده د ته‌مه‌نه‌كی بچووك ده ب كوشتن داین و پاش ده‌رباسبوونا سالان ژ نوو ڤه مرنا وان ئیفشا دكه، پشتی كو به‌رێ وان دده مرنێ، د په‌سنێ وان ده دبێژه مه فه‌دایێ ئاپۆ كرن!، پارتیا كاركه‌ران ووسا زارۆكێن كوردان مه‌حكوومی مرنا ژ بۆ ئاپۆ كرنه.
