سەرۆکێ رووسیایێ ئەشکەرە دکە، ناڤەندا کو ئەو دخوازن ل ترکیەیێ ئاڤا بکن، نە کۆمەلگەھەکا گازێ یە، ئارمانجا وان ئاڤاکرنا پلاتفۆرەمەکا ئەلەکترۆنی بۆ فرۆتنا گازێ یە.
سەرۆکێ رووسیایێ ڤلادیمێر پوتین د جڤینەکا رۆژنامەڤانی دە ل سەر ئەگەرا ھەڤدیتنا خوە یا لگەل سەرۆککۆمارێ ترکیێ رەجەب تەییب ئەردۆگان ئاخڤی و دا زانین کو، ئەوێ رۆژا چارشەمبێ پێوەندیەکا تەلەفۆنی بکن و ھەتا نھا بریار ل سەر جھێ جڤینا رووبروو نەھاتیە دایین کا دێ ل ترکیێ برێڤە بچە یان ل رووسیایێ.
پوتین ل سەر پرۆژەیا ئاڤاکرنا ناڤەندەکا گازێ یا ل ترکیێ گۆت، ئارمانجا وان ئاڤاکرنا پلاتفۆرەمەکا ئەلەکترۆنی یە بۆ فرۆتنا گازێ، لێ ئاڤاکرنا ناڤەندەکا ژ بۆ بەرھەڤکرنا گازێ ژی هێژ د کارنامەیا وان دە جھ دگرە.
پوتین سالا بۆری بیرۆکەیا ئاڤاکرنا “ناڤەندا گازێ” یا رووسی ل ترکیێ پێشنیار کربوو، ب تایبەت پشتی کو وەلاتێن ئەورۆپی ھاوەردەکرنا ئەنەرژیێ ژ رووسیایێ پشتی شەرێ وێ یێ ل ئوکراینایێ ب توندی کێم کربوو.