پاکێ و تەڤگەرێ یەکیتیا خوە راگھاندن

پارتیا ئازادیا کوردستانێ (پاک)ێ و تەڤگەرا دەمۆکراتیکا کوردستانێ (تەدەکە-تەڤگەر)ێ بریارا یەکتیێ راگھاندن. ل گۆری راگھاندنا رایەدارێن ھەر دو ئالیان؛ ل باکورێ کوردستانێ پێویستی ب وێ یەکێ ھەیە کو ھەموو پارتی، تەڤگەر، رێخستن، گرووپ و کەسایەتێن کو بەرنامە، نێرینێن وان یێن سیاسی، نێرینێن وان یێن د دەربارێ شکلێ خەباتێ و رێخستنی دە وەک ھەڤن، نێزیکی ھەڤن، یەکتیا خوەیا سیاسی و رێخستنی پێک بینن.

پارتیا ئازادیا کوردستانێ (پاک)ێ تەڤگەرا دەمۆکراتیکا کوردستانێ (تەدەکە-تەڤگەر)ێ ب داخویانیەکا نڤیسکی راگھاند کو ئەو ھێزێن خوە دکن یەک و دێ ئێدی ب ھەڤ را تێکۆشینا خوەیا سیاسی بمەشینن. ژ ئالیێ پاک و تەڤگەرێ ڤە ئەڤ داخویانی ھات راگھاندن: “ئەم وەک تەدەکە-تەڤگەر و پاک، ب گەشبوون و ب  دلخوەشی دخوازن گەلێ خوە ئاگاھدار بکن کو مە بریار دایە ئەمێ د ناڤ یەک پارتیێ دە یەکتیا خوەیا رێخستنی و سیاسی پێک بینن.

تەدەکە-تەڤگەر و پاک د ئیلۆنا 2023 دا دێ کۆنگرەیا خوەیا یەکتیێ ل دار بخن و دێ وەک پارتیەکا نوو د قادا سیاسی یا دۆزا ئازادی، رزگاری و سەرخوەبوونا کوردستانێ دا خەباتێن خوە بمەشینن. تەدەکە-تەڤگەر و پاک ژ بۆ رێلبەرڤەکرن و ئامادەکاریا یەکیتیەکا سیاسی و رێخستنیێ ئەڤ ل دەردۆرا سالەکێیە کو د ناڤ دیالۆگ و خەباتەکا بەرفرەھ دە نە.

پشتی جڤین و خەباتێن ھەڤبەش، داخویانیا سیاسی یا ھەڤبەش و رەشنڤیسا بەرنامەیێ و راپۆرتێن خەباتێ یێن کو ژ ئالیێن کۆمیسیۆنا  ھەڤبەشا تەدەکە-تەڤگەرێ و پاکێ ڤە ھاتبوون ئامادەکرن، ب ئەندام و پشتگرێن پاک و تەڤگەرێ را ھاتن پارڤە کرن. ئەندام و پشتگرێن  پاک و تەڤگەرێ ل گەل نەرین، نرخاندن و پێشنیاریێن خوەیێن چێکەر، خاباتا یەکیتیا سیاسی و رێخستنی پەسناندن و پشتگریەک گرینگ دانە پێڤاژۆیا یەکیتیێ.

تەدەکە-تەڤگەر و پاکا کو دێ ب ھەڤ رە پارتیەکا نوو ئاڤا بکن، خوە ب چ رێخستن و کەڤنەشۆپیێن سیاسی ڤە پێناسە ناکن؛ ئەو خوە بەردەوامیا دۆزا ئازادی، رزگاری و سەرخوەبوونا کوردستانێ دبینن. ھەروەھا؛ ئەو خوە بەردەوامیا ھەموو تێکۆشین، خەبات، کەد و نرخێن ملی، دەمۆکراتیک، نیشتمانی یێن کوردستانێ دبینن.

ب ڤێ ھشمەندیێ و ب ڤێ باوەریێ، تەدەکە-تەڤگەر و پاک دبێژن ل باکورێ کوردستانێ پێویستی ب وێ یەکێ ھەیە کو، ھەموو پارتی، تەڤگەر، رێخستن، گرۆپ و کەسایەتێن کو بەرنامە، نێرینێن وان یێن سیاسی، نێرینێن وان یێن د دەربارێ شکلێ خەباتێ و رێخستنی دە وەک ھەڤن، نێزیکی ھەڤن، یەکتیا خوە یا سیاسی و رێخستنی پێک بینن. یەکتیا تەدەکە-تەڤگەرێ و پاکێ ژی بەرھەم و نیشانا ڤێ ھشمەندیێ یە و بەشەکا بجیھانینا ڤێ پێویستیێ یە.

ئاڤاکرنا پارتیەکا ب ڤی رەنگی، ھەلبەتە کو پێویستیا ھەڤکاری و تفاقێن نەتەوەیی، دەمۆکراتیک ژ ھۆلێ راناکە. ھەڤکاری و تفاقێن نەتەوەیی، دەمۆکراتیک یێن ل سەر پرەنسیبێن نەتەوەیی، کوردستانی بێنە ئاڤا کرن پێویستی و وەزیفەیەکا مەیا سەرەکی یا مللییە. لێ ئاشکەرەیە کو ل باکورێ کوردستانێ پارتیەکا خورت، جەماوەری، مللی، دەمۆکرات، ئازادیخواز، کوردستانی دێ د ئاڤاکرن، برەڤەبرن و بەردەوامیا پلاتفۆرم، ھەڤکاری، تفاق و ب ھەڤ را خەباتێن ھەڤبەشیێن ملی، دەمۆکراتیک ژی ببە بنگەھەکی ئەساسی.

بێگوومان، پێویستیا یەکتیا سیاسی و رێخستنی یا پارتی، تەڤگەر، رێخستن، گرووپ و کەسایەتێن ملی، دەمۆکرات، ئازادیخواز، کوردستانی یێن کو بەرنامە و نێرینێن وان یێن سیاسی وەک ھەڤن، نێزیکی ھەڤن، ب یەکتیا تەدەکە-تەڤگەرێ و پاکێ ب داوی نایێ. پارتیا کو دێ ب یەکتیا تدک-تەڤگەر و پاکێ بێ ئاڤا کرن ژی د ھەر قۆناغێ دە ئامادەیە کو لگەل پارتی، تەڤگەر، رێخستن، گرۆپێن وەک وێ، نێزیکی وێ یەکتیا سیاسی و رێخستنی پێک بینە.

ب ڤێ ھشمەندیێ، ئەم وەک تەدەکە-تەڤگەر و پاک بانگی ھەموو سیاسەتمەدار، دەردۆر، رەوشەنبیر و وەلاتپارێزێن کوردستانی یێن وەک مە، نێزیکی مە دفکرن دکن کو ژ دەرڤەیی ڤێ پێڤاژۆیا یەکیتیا سیاسی و رێخستنی یا ژ بۆ ئاڤاکرنا پارتیەکا نوو یا نەتەوەیی، دەمۆکراتیک، ئازادیخواز، کوردستانی، مەشرووع، لەگال “تشتێ کو ل گۆر یاسایێ راست و دروستە” و جەماوەری نەمینن؛ ب بەشداری، ھەلوەست، داخواز و پێشنیارێن خوە ئاڤاکرنا پارتیەکا وەھا بەرفرەھتر و دەولەمەندتر بکن. وەرن ئەم ب ھەڤ را ژ بۆ خورتکرن و گەشکرنا تەڤگەرا رزگاریخوازیا نەتەوەیی و دەمۆکراتیک و سەرکەتنا ئارمانجێن نیھایی ڤێ گاڤا دیرۆکی باڤێژن.”