ئامەریکایێ سزا ل سەر 39 کەس و کۆمپانیێن پشتەڤانێ داعشێ و ئەل قاعیدەیێ سەپاندن و راگھاند، ئەو دێ رووبروویی ھەموو گەفێن گرووپێن تەرۆریست ببن.
وەزارەتا دەرڤە یا ئامەریکایێ ئیرۆ 1ێ تەباخا 2023 د داخویانیەکێ دە راگھاند، حکوومەتا ئامەریکایێ 18 کەسێن مالدیڤی یێن کو پشتەڤانیا داعشێ دکن، 2 ئەندامێن ئەل-قاعیدەیێ و 29 کۆمپانیێن کو پشتەڤانیا داعشێ و قاعیدە دکن، خستیە لیستەیا سزایێن خوە.
دیار کر ژی، د ناڤ کەسێن تێن سزادان دە، سەرکردە و ئەندامێن شانەیێن داعشێ یێن ل مالدیڤێ و کەسێن دن یێن کو ئێریشێن تەرۆریستی ل سەر رۆژنامەڤان و حکوومەتان پلان دکرن، ھەنە.
تەکەز کر ژی، ئەو دێ ل سەر رێگرتنا ل ھەموو پشتگری یێن دارایی یێن ژ بۆ تەرۆریستێن ل مالدیڤێ بەردەوام بن، ھەروھا ئەو دێ ل سەر ئاستا ھەرێمێ و ھەم ژی ل قادا ناڤدەولەتی رووبروویی ھەموو گەفێن ڤان کۆمێن تەرۆریست ببن.
ئەڤ یەک د دەمەکێ دە یە، رۆژا 15ێ تیرمەھا 2023، ئالیکارێ دۆزگەرێ گشتی یێ بەشێ ئاسایشا نیشتیمانی یا سەر ب وەزارەتا دادێ یا ئامەریکا ڤە، ماتیۆ ئۆلسن گۆت: کەسەکی ب ئەسلێ خوە ژ کۆسۆڤایێ یە ب تۆمەتا پەیداکرنا چەکان ژ بۆ داعشێ ھات گرتن و سزایێ ھەتاھەتایێ لێ ھات برین.
ئالیکارێ سەردۆزگەرێ گشتی یێ ئاسایشا نیشتیمانی دیار کر ژی: ئەو ئەندامێ داعشێ یێ سزایێ گرتنا ھەتاھەتایی لێ ھاتیە برین، ناڤێ وی میرساد کاندیکە و 41سالی یە.
ل گۆر ئامارێن داوی یێن فەرمی، ژ سالا 2014 و ڤر ڤە ل ئامەریکایێ 246 کەس ب تاوانا پێوەندیا لگەل داعشێ ھاتنە گرتن، ژ ڤان 198 کەسان ل خوە مکور ھاتن کو تێکلیا وان لگەل داعشێ ھەبوو.
