رێڤه‌به‌رییا ژوور یا پارتییا كاركه‌ران و شه‌خسێ جه‌میل باییك یێ هه‌ڤسه‌رۆكێ رێخستنێ، گه‌ف ل قوباد تاله‌بانی یێ ئه‌ندامێ پۆلیتبیرۆیا یه‌نه‌كێ كرنه و ژێ ره گۆتیه كو تێكلیێن پارتیا كاركه‌را و یه‌نه‌كێ ب رییا بافل تێن برێڤه‌برن و هه‌گه‌ر ئه‌و هه‌ولا تێكبرنا ڤان پێوه‌ندییان بده، ئه‌وێ وه‌ره جه‌زا كرن.
پێگه‌ها «داركا مازی» ژ هن چاڤكانیێن ده‌ردوورا قوباد تاله‌بانی هین بوو كو پاش سه‌ردانا قوباد تاله‌بانی یا ژبۆ تركیێ و هه‌ر وها كوشتنا هن كادرۆ و رایه‌دارێن پارتیا كاركه‌ران د سینۆرێ پارێزگه‌هییا سلێمانیێ ده، پارتیا كاركه‌ران ژ یه‌نه‌كێ پڕ نیگه‌ران و عاجزه، رێڤه‌به‌رییا پارتیێ گه‌ف ژی ل رێڤه‌به‌رییا یه‌نه‌كێ و شه‌خسێ قوباد تاله‌بانی خوارنه كو هه‌گه‌ر ئه‌و پێداچوونێ د ره‌فتارێن خوه یێن ب پارتیا كاركه‌ران ره نه‌كن، ئه‌وێ ئه‌وله‌هییا سلێمانیێ هه‌ده‌ف بگرن.
چاڤكانیێن ده‌ردوورا تاله‌بانی ژ بۆی داركا مازی ئه‌شكه‌ره كرن كو پارتیا كاركه‌ران ئه‌شكه‌ره ژ وان ره گۆتییه كو ئه‌وێ خه‌ته‌ریێ بخن سه‌ر سلێمانیێ و ژ قوباد تاله‌بانی خواستنه كو ئێدی پێوه‌ندی و تێكلیێن یه‌نه‌كێ و پارتیا كاركه‌ران دێ ژ هێلا شه‌خسێ بافل تاله‌بانی ڤه وه‌رن برێڤه‌برن و گه‌ف ل قوباد كرنه هه‌گه‌ر ژ بۆی تێكبرنا ڤان پێوه‌ندییان بكه‌ڤه ناڤا هه‌ولدانان.
ئه‌ڤ نیگه‌رانیێن پارتیا كاركه‌ران ژ ئه‌نجاما هه‌ولێن یه‌نه‌كێ و قوباد تاله‌بانی یێن دوباره ئۆرگانیزه كرنا پێوه‌ندیێن یه‌نه‌كێ ل گه‌ل په‌كه‌كێ نه كو دهات چاڤه‌رێكرن یه‌نه‌كه هنه‌ك بریاران ژ بۆی رازیكرنا ده‌وله‌تا ترك ل دژی رێخستنا په‌كه‌كێ بگره، لێبه‌لێ بافل تاله‌بانی ب فیتا رێڤه‌به‌رییا په‌كه‌كێ و شه‌خسێ جه‌میل باییك پێشی ل ڤان هه‌ولێن قوباد تاله‌بانی گرتنه.
چاڤكانیێن كو ئه‌ڤ ئاگاهی دانه داركا مازی هه‌ر وها ئه‌شكه‌ره كرن كو د په‌یاما گه‌فخوارنێ یا په‌كه‌كێ ژ بۆی قوباد تاله‌بانی ده ئه‌ڤ یێك هاتییه گۆتن: «ب سه‌ده‌ما هه‌ماهه‌نگییا قوباد تاله‌بانی یا ب ده‌وله‌تا ترك ره، هه‌ژماره‌كا كادرۆ و رایه‌دارێن رێخستنێ ل سلێمانیێ كه‌تن به‌ر ئێریشێن ده‌وله‌تا ترك، هنه‌كان ژیانا خوه وه‌ندا كر و هنه‌ك ژێ بریندار بوون، هنه‌ك ژی ژ ترسا تاسفیه كرنێ ژ سلێمانیێ ره‌ڤیان، ئه‌ڤ یێك ژ یه‌نه‌كێ نایێ قه‌بوول كرن».
وان چاڤكانییان هه‌ر وها ناڤه‌رۆكا په‌یامه‌كا شه‌خسێ جه‌میل باییك بۆ یه‌نه‌كێ ژی ژ بۆی داركا مازی ئه‌شكه‌ره كر و گۆتن كو «جه‌میل باییك یه‌نه‌كه ئاگه‌هدار كریه كو ژ ئیرۆ ڤه پێوه‌ندی، تێكلی و هه‌ماهه‌نگییا نێڤبه‌را پارتیا كاركه‌ران و یه‌نه‌كێ دێ ژ هێلا بافل تاله‌بانی ڤه وه‌رن برێڤه‌برن و نابه قوباد تاله‌بانی هه‌ولا تێكبرنا ڤان پێوه‌ندییان بده، هه‌گه‌ر نه ئه‌وێ وه‌ره جه‌زا كرن».
