مایینا کو چەکدارێن پەکەکێ چاندبوو ب شڤانکارەکی 16 سالی دە تەقیا ب ڤێ سەدەمێ ب گرانی بریندار بوو.
ل گۆر ئاگاهیێن تایبەت یێن پێگەها دارکا مازی، مایینەکا پەکەکێ ب شڤانکارەکی ب ناڤێ “سیروان نەبی سالح” کو تەمەنێ وی 16 سالن دە تەقیایە، سیروان ژ نیشتەجیێن گوندێ “ڤێژان” یێ سەر ب باژارۆکێ سیدەکانێ یە.
چاڤکانیێن پێگەها دارکا مازی ئەشکەرە کرن، ل رۆژا 28/7/2023 ل چیایێ سەرۆکە ل کیستانێن باژارۆکێ سیدەکان ئەڤ جوانێ 16 سالی دەما مژوولی چەراندنا کارکێن خوە بوو، مایینەکا چاندی یا پەکەکێ ب وی دە دتەقە و د ئەنجام دە ب گرانی بریندار دبە.
چاڤکانیێن دارکا مازی هەر وەها ئەشکەرە کرن، ب سەدەما ڤێ تەقینێ دەستێ راستێ یێ سیروان نەبی سالح ژێڤەبوویە و هەردو لنگێن وی ژی شکەستنە، نها سیروان نەبی ل نەخوەشخانەیا رۆژئاڤا یا هەولێرێ یە و ل ور تێ تەداویکرن.
ئەڤ نە جارا یەکەمە گەلێ باشوور دبە قوربانیێ ڤان مایینێن پەکەکێ، ل پرانیا جیهێن کو چەکدارێن پەکەکێ لێ هەیی، ولاتیێن باشوور راستی چارەنووسێ ب ڤی ئاوایی تێن و دبن قوربانی.
