ترکیە و بریتانیایێ ژ بۆ ڤەگەراندنا کۆچبەرێن قاچاخ رێكکەفتنەک ئیمزا کر.
ل گۆری رێکكەفتنێ کۆچبەرێن کو ژ ترکیەیێ ب بەلەمان دچنە بریتانیایێ دێ بێنە ڤەگەراندن.
مەدیایا بریتانیایێ راگهاند کو د ناڤبەرا ترکیە و بریتانیایێ دا ژ بۆ ڤەگەراندنا کۆچبەرێن قاچاخ رێکكەفتنەک هاتیە ئیمزا کرن.
ل گۆری رێکكەفتنێ دێ رێ ل بەر کۆچبەرێن قاچاخ بێ گرتن و وەلاتیێن ترکیەیێ کو ب بەلەمێن بچووک ب رێیا دەریایا مانشێ دچن بریتانیایێ دێ بێن ڤەگەراندن.
ترکیە، ناڤەندا قەچاخچیتیا مرۆڤانە
ترکیە، د مەدیایا بریتانیایێ دە وەکی “ناڤەندا قەچاخچیتیا مرۆڤان” هاتیە پێناسەکرن و هاتیە نڤیساندن کو پرانیا بەلەمێن کۆچبەران ل ترکیەیێ تێن چێکرن.
ل گۆری رێكکەفتنێ ترکیە و بریتانیا ژ بۆ رێ ل بەر قاچاخچیتیێ بگرن دێ ئۆپەراسیۆنێن هەڤبەش بکن و فرۆتنا بەلەمان بێ ئاستەنگکرن.
