سەرۆککۆمارێ ترکیێ رەجەب تەییب ئەردۆگان رادگھینە، ئەو پابەندێ سۆزێن خوەیێن بۆ زەرەرمەندێن ئەردەھەژێ نە و د ناڤا سالەکێ دە دێ 319 ھەزار خانیان رادەستی وان بکن.
رەجەب تەییب ئەردۆگان ب رێیا ڤیدیۆکۆنفەرانسێ بەشداری مەراسیما دانینا کەڤرێ بنگەھین یێ ڤەگوھەرینا باژێرێ مەرەشێ بوو و ئەشکەرە کر کو، 160 ھەزار کەسان بەشداری پرۆژەیا ڤەگوھەرینا باژێری بوونە.
ئەردۆگان ھەروھا د دەرھەقێ سۆزا خوەیا بۆ زەرەرمەندێن ئەردھەژێ ژی ئاخڤی و تەکەز کر کو وی سۆزا خوە ژبیر نەکریە و دێ ئیسال 319 ھەزار خانیان رادەستێ زەرەرمەندێن ئەردھەژێ بکن. ئەردۆگان ھەروھا گۆت ھەتا 15 تەباخێ چ کەس ل کۆنان نامینە و دێ بۆ کۆنتینەران هێة ڤەگوھاستن.
سەرۆککۆمارێ ترکیێ گۆت: “دڤێت ل مەرەشێ 19 ھەزار و 418 خانیێن ئەردھەژێ بهێن چێکرن. ب خانیێن گوندان ئەڤ ھەژمار دبە 29 ھەزار و 47. ل ناڤچەیا ئەردھەژێ ژی دڤێت ب گشتی 680 ھەزار خانی بهێن ئاڤاکرن. ھەتا 15 تەباخێ ئەم چ کەسان ل کۆنان و مێڤانگەھان ناھێلین و دێ وان ل کۆنتینەران بجھ بکن. د ناڤا سالا یەکەما ئەردھەژێ دە ئارمانجا مە ئاڤاکرنا 319 ھەزار خانیانە داکو رادەستێ زەرەرمەندێن ئەردھەژێ بکن.”
