ئارتێشا تركیێ ئیشه‌ڤ جاره‌كه دن گوندێ گوهه‌رزێ یێ ل ده‌ڤه‌را نهێلییا ل قونتارا چیایێ مه‌تینایێ تۆپباران كر و هنه‌ك تۆپ ب ناڤه‌ندا گوند كه‌تنه.
چاڤكانیێن پێگه‌ها داركامازی ئاشكه‌ره كرن، ئیرۆ ل دانێ شه‌ڤێ 17/8/2023 ئارتێشا تركیێ گوندێ گوهه‌رزێ یێ گرێدای قه‌زایا ئامێدیێ تۆپباران كر و هنه‌ك گوللـه تۆپ ب نێزی مالا هه‌مولاتییه‌كی گوند یێ ب ناڤێ محه‌مه‌د ئه‌مین كه‌تنه.
تۆپخانه‌یا ئارتێشا تركیێ ل 6 ته‌باخا ئیسال ژی گوللـه تۆپه‌ك ئاڤێت ناڤه‌ندا گوندێ گوهه‌رزێ و ب به‌ر ماله‌كێ كه‌ت و زیان ل په‌ی خوه هشتن.
ل هه‌مان رۆژێ بالافرێن كه‌شفێ ل ئۆتۆمبیلا هه‌مولاتیه‌كی ناڤچه‌یا چه‌مانكێ ژی خستبوو و ب وێ سه‌ده‌مێ جوانێ ب ناڤێ ئالان ئیسماعیل كو 5 مه‌هـ بوون زه‌وجی بوو شه‌هید كه‌ت و كه‌سه‌ك دن ژی بریندار ببوو.
گوندێ گوهه‌رزێ یێكه ژ گوندێن ده‌ڤه‌را نهێلێ دكه‌ڤه قونتارا چیایێ مه‌تینایێ ب دووراتییا (20) كیلۆمه‌ترویان ب ئالێ رۆژهلاتا باژێرێ ئامێدیێ، ژووریا گوند زنجیرا چیایێ مه‌تینی یه و ژێریا گوند سپنه‌یه، رۆژهلاتا گوندی زێ یه و رۆژئاڤا گوندێ (به‌ڵاڤه‌یه) هه‌ف سینۆره ب گوندێن گێرگاش ، مه‌هیدێ، ڕه‌شاڤه ، به‌رچی ، به‌ڵاڤه، برکاهینێ ، کومه‌لگه‌ها دێره‌لوکێ .
