ئیسرایلێ ب مووشەکان ھندەک خالێن دن ل دەردۆرا شامێ کرن ئارمانج و ژێدەرەکی لەشکەری یێ سووری ژی دبێژە، لەشکەرەک بریندار بوویە.
ئاژانسا فەرمی یا نووچەیان یا سووریێ “سانا” ل سەر زارێ ژێدەری لەشکەری راگھاند، ئیسرایلێ شەڤا بۆری دەمژمێر 23:05 ژ ئالیێ گۆلانێ ڤە ئێریشەکا ئاسمانی پێک ئانی و ھندەک خالێن ل دەردۆرا شامێ کرن ئارمانج.
وی ژێدەری گۆت ژی، سیستەما بەرەڤانیا ئاسمانی یا سووریێ رووبروویی مووشەکێن ئیسرایلێ بوو پرانیا مووشەکان خستن خوارێ.
دا زانین ژی: د ئەنجاما ئێریشێ دە لەشکەرەک بریندار بوو و تەنێ ھندەک زیانێن مادی چێبوون.
ژ ئالیێ خوە ڤە، رەوانگەھا سووری یا مافێن مرۆڤان دیار کر، ئیسرایلێ 3 جھ ل دەردۆرا فرۆکخانەیا شامێ و دەڤەرا کسوێ مووشەکباران کرن کو کۆمەلگەھێن لەشکەری و یێن میلیشیایێن سەر ب ئیرانێ ڤە لێ نە.
رەوانگەھێ دا زانی ژی، د ئەنجاما ئێریشێ دە، 2 چەکدارێن کو ناسنامەیا وان نەدیارە ھاتنە کوشتن.
ژ دەستپێکا کریزا سووریێ ڤە، ھەر جار ئیسرایل ئێریشی بارەگەھێن ئارتێشا سووریێ و میلیشیایێن سەر ب ئیرانێ ڤە دکە. ئیسرایل سووریێ تۆمەبار دکە کو ئەو رێ ددە ھێزێن سەر ب ئیرانێ ڤە ژ ناڤا سووریێ ڤە ئێریشی ئیسرایلێ بکن.
