وەزیرێ دەرڤە یێ ترکیێ ئیرۆ سەردانا بەغدا و ھەولێرێ دکە

بەردەڤکێ وەزارەتا دەرڤە یا ئیراقێ ئەحمەد سەحاف راگھاند، وەزیرێ دەرڤە یێ ترکیێ ھاکان فیدان ئیرۆ ب سەردانەکا فەرمی دگھە بەغدایێ و دێ دو رۆژان بمینە.

سەحاف دا زانین، وەزیرێ دەرڤە یێ ترکیێ د ڤێ سەردانێ دە دێ لگەل سەرۆککۆمارێ ئیراقێ لەتیف رەشید، سەرۆکوەزیرێ ئیراقێ محەمەد شیاع سوودانی، سەرۆکێ پارلامەنتۆیا ئیراقێ محەمەد حەلبووسی و وەزیرێ دەرڤە فوئاد حوسێن بجڤە.

ژ ئالیێ خوە ڤە، وەزارەتا دەرڤە یا ترکیێ د داخویانیەکێ دە راگھاند، وەزیرێ دەرڤە یێ ترکیێ ھاکان فیدان د ناڤبەرا22  – 24ێ تیرمەھێ دە سەردانا بەغدا و ھەولێرێ دکە.

ل گۆری داخویانیا وەزارەتا دەرڤە یا ترکیێ، ھاکان فیدان دێ ل بەغدا و ھەولێرێ ھەڤدیتنێن د ئاستا بلند دە بکە. ل سەر بنگەھا ئاژاندایەک ئەرێنی، دێ د ھەموو واران دە ھەڤکاری ل گەل ئیراقێ بێ پێشخستن و پێشھاتێن ھەرێمی و ناڤدەولەتی بێن گۆتووبێژکرن.”

پرسا پشکا ئاڤێ یا ئیراقێ ژی یەک ژ مژارێن ل سەر ماسەیێ یە

بەردەڤکێ وەزارەتا دەرڤە یا ئیراقێ ئەحمەد سەحاف راگھاند، وەزیرێ دەرڤە یێ ترکیێ ھاکان فیدان دێ رۆژا چارشەمبێ سەردانا بەغدایێ بکە و دێ لگەل رایەدارێن پایەبلند ئێن ئیراقێ پەیوەندیێن د ناڤبەرا بەغدا و ئەنقەرەیێ دە و مژارێن ھەڤپار یێن ھەر دو وەلاتان گۆتووبێژ بکە.

سەحاف گۆت، وەزیرێ دەرڤە یێ ترکیێ دێ لگەل وەزیرێ دەرڤە یێ ئیراقێ فوئاد حوسێن بجڤە و دێ پەیوەندیێن د ناڤبەرا ھەر دو وەلاتان دە گۆتووبێژ بکن. ھەر وھا دێ گوفتووگۆیان دەربارێ پرسێن ئەولەھیا ھەڤبەش ژ بۆ پاراستنا ئەولەھیا ھەرێمێ بکن.

پێشتر ژی بەردەڤکێ حکوومەتا ھەرێما کوردستانێ پێشەوا ھەورامانی ل سەر رووپەلا خوە یا “فەیسبۆکێ” نڤیسیبوو: “د ڤێ ھەفتەیێ دە وەزیرێ دەرڤە یێ ترکیێ دێ سەردانا ئیراق و ھەرێما کوردستانێ بکە و دێ ل ھەولێرێ لگەل سەرۆکوەزیرێ ھەرێما کوردستانێ بجڤە.”