درۆنەکا ترکیێ ئۆتۆمۆبیلەکا ل سەر رێیا حەسەکێ – قامشلۆ بۆمبەباران کر و د ئەنجامێ دە کەسەک ھاتە کوشتن و کەسەک ژی بریندار بوو.
رەوانگەھا سووری یا مافێن مرۆڤان (سۆھر) بەلاڤ کر، درۆنەکا ترکیێ دوھی ئۆتۆمۆبیلەکا رۆژنامەڤانان ل نێزیکی مەزارگەھا شێخ جەبر یا د ناڤبەرا باژارێن حەسەکێ و قامشلۆ دە بۆمبەباران کر، د ئەنجامێ دە شۆفێر ھات کوشتن و یەکی دن ژی بریندار بوو.
ل گۆری مەدیایا سەر ب رێڤەبەریا خوەسەر ڤە ژی، ئۆتۆمۆبیلا کەنالا “ژن تیڤی” دوھی پشتی نیڤرۆ ژ ئالیێ درۆنا ترکیێ ڤە ھات ئارمانجکرن و د ئەنجامێ دە یەک ژ خەباتکارێن کانالێ یێ ب ناڤێ “نەجمەدین فەیسەل حاج سینان” جانێ خوە ژدەست دا و رۆژنامەڤانەکا کانالێ ژی بریندار بوو.
ژ ئالیێ خوە ڤە، ناڤەندا راگھاندن و چاپەمەنیێ یا باکور و رۆژھلاتێ سووریێ ب داخویانیەکێ ئێریشا ترکیێ ل سەر ئۆتۆمۆبیلا “ژن تیڤی” شەرمەزار کر و بانگ ل جڤاکا ناڤدەولەتی و رێخستنێن مافێن مرۆڤان و ئالیێن پەیوەندیدار کر کو دەستێوەردانێ بکن و داوی ل ئێریشێن ترکیێ و گرۆپێن چەکدار یێن سەر ب وێ ڤە بینن.
ل گۆر زانیاریێن رەوانگەھا سووری یا مافێن مرۆڤان، ژ دەستپێکا ئیسال ڤە، ئارتێشا ترکیێ 37 ئێریشێن ئاسمانی ب ریا درۆنان ل سەر ھەرێمێن رۆژئاڤایێ کوردستانێ و رێڤەبەریا خوەسەر کرنە و د ئەنجامێ دە 54 کەس ھاتنە کوشتن و زێدەتر ژ 50 کەسی ژی بریندار بوونە.
