ترکیێ ل پێنجوێنێ ئۆتۆمۆبیلەکا چەکدارێن پەکەکێ کرە ئارمانج

ل پێنجوێنێ د ئەنجاما ئێرشا بالافرێن شەری یێن ترکیێ دە 3 پەکەکەیی ھاتن کوشتن.

ل گۆری داخویانیا دژە تەرۆرا کوردستانێ، ئیرۆ یەکشەمبێ 27.8.2023 فرۆکەیەکا بێ فرۆکەڤانا ئارتێشا ترکیێ ل نێزیکی گوندێ زەنگیدەر یێ سەر ب ناڤچەیا گەرمکی یا سەر ب ناڤچەیا پێنجوێنێ یا سلێمانیێ ڤە ئۆتۆمۆبیلەکا چەکدارێن پەکەکێ کر ئارمانج.

بەری نھا ژی دژە تەرۆرا کوردستانێ راگەھاندبوو کو، رۆژا 11.8.2023، دەمژمێر 15:30 فرۆکەیەکا بێ فرۆکەڤانا ئارتێشا ترکیێ ل نێزیکی ناڤچەیا نالپارەزا سەر ب ناڤچەیا پێنجوێنێ یا سەر ب پارێزگەھا سلێمانیێ ڤە، ئۆتۆمبیلەکا چەکدارێن پەکەکێ کربوو ئارمانج و د ئەنجامێ دە بەرپرسەکی پەکەکێ و شەرڤانەکی دن و شۆفێرێ وەساییتێ ژی ھاتبوون کوشتن. د 24 تەباخا 2023 دە ژی، فرۆکەیەکا بێ فرۆکەڤانا ئارتێشا ترکیێ ل سەر رێیا سنینە، ل ناڤچەیا سیدەکان یا پارێزگەھا ھەولێرێ، ئۆتۆمۆبیلەکا چەکدارێن پەکەکێ کربوو ئارمانج و د ئەنجامێ دە بەرپرسەکی بلند و دو چەکدارێن پەکەکێ ھاتبوون کوشتن.

ژ بەر شەرێ ناڤبەرا پەکەکێ و ترکیێ ل ھەرێما کوردستانێ نێزیکی 800 گوند و چەند دەڤەرێن گەشتیاریێ و چاندنیێ ل ھەرێما کوردستانێ وێران بوونە و ھندەک ناڤچە ژی ھاتنە چوولکرن، پرانیا ڤان ناڤچەیان دکەڤنە سینۆرێ پارێزگەھا دوھۆکێ، ئەڤ یەک ژی بوویە سەدەما زرارێن مەزن ژ بۆی کەرتێ گەشتیاریێ و چاندنییێ.

ل گۆر ئامارێن داوی، ژ بەر شەر و پەڤچوونان 274 گوندێن پارێزگەھا دوھۆکێ ھاتنە ڤالاکرن کو 250 گوندێن ناڤچەیا ئامێدیێ و 24 گوندێن ناڤچەیا ئاکرێ نە. ژ ئالیێ دن ڤە ژ بەر شەر و پەڤچوونان 47 گوندێن زاخۆیێ ھاتنە ڤالاکرن.

ل سۆران ژی ژ بەر شەرێ د ناڤبەرا پەکەکێ و ترکیێ دە 188 گوند ھاتنە ڤالاکرن، ژ ڤان گوندان 104 گوندێن ناڤچەیا سیدەکانێ، 65 گوندێن ناڤچەیا مێرگەسورێ، 15 گوندێن ناڤچەیا چۆمانێ و 4 گوندێن ناڤچەیا رواندزێ نە.

شەر و پەڤچوونێن پەکەکێ زیانەکا مەزن گھاندیە دەڤەرێن گەشتیاریێ ژی، ژ وان 25 سەیرانگەھ ل زاخۆیێ بوونە ناڤچەیێن شەری و وێران بوونە و 10 دەڤەر ژی کەتنە بن باندۆرا شەر و پەڤچوونان.