سەرۆکێ گشتی یێ جەهەپێ کەمال کلچدارۆغلو، ژ بۆ ھلبژارتنێن 28 گولانێ لگەل گەلەک پارتیان هەڤپەیمانی چێکربوو، ب شکەستنەکێ ژ ھلبژارتنێ دەرکەت. ھەر چەند ھلبژارتن قەدیا ژی لێ دیسان گۆتوبێژێن ڤێ تێکچوونێ بەردەوام دکن. د دەمەکی دە کو کلچدارۆغلو د ناڤا پارتیێ دە ب داخوازا دەست ژ کار کێشانێ روو ب روویە، ھەڤکارێن هەڤپەیمانیێ یێن وەک مەرال ئاکشەنەر د ئاخافتنێن خوە دە سەرۆکێ جەهەپێ دکن ئارمانج و وی ب توندی رەخنە دکن. ب تایبەتی ژی گۆتنا سەرۆکێ پارتیا سەرکەفتنێ ئومید ئۆزداگ کو گۆتبوو لگەل کلچدارۆغلو رە پرۆتۆکۆلەکا ڤەشارتی ئیمزە کرنە و ژ ئالیێ سەرۆکێ گشتی یێ جەهەپێ ڤە ھاتیە قەبوولکرن، راستی بەرتەکێن مەزن ھات.
ئۆزداگ دابوو خویاکرن کو، “ژ بۆ 3 وەزارەتان پەیمانەکا نڤیسکی ئیمزە کرن” ژ بۆ تەشکیلاتا ئیستخباراتا نەتەوەیی ژی ب دەڤکی ل ھەڤ کرنە. ئۆزداگ رۆژەک بەرێ راگھاندبوو کو کلچدارۆغلو د ھەیاما ھلبژارتنێ دە”سۆز” دایە 2 وەزارەتێن دن ژی بدە وان. ئۆزداگ گۆت، “سۆزا وەزارەتا چاند و تووریزمێ و وەزارەتا پەروەردەیا نەتەوەیی ژی ھات دایین. لێ مە ل سەر ڤان ب مەتنەکا نڤیسکی ل ھەڤ نەکر.”
پشتی ڤان داخویانیان ژ ئالیێ باسکێ هەدەپێ یێ کو پشتگری دای کلچدارۆغلو ژی کارڤەدان ھات نیشاندان. پارلامەنتەرا ئەرزرۆمێ بەشتاش کارڤەدان نیشان دا و راگهاند، کلچدارۆگلو لگەل ئوومید ئۆزداگ پرۆتۆکۆلا ڤەشارتی چێکر و ژ بۆ ھندەک وەزارەتان سۆز دابوو وی و وھا گۆت: “ما ژ بۆ کو ئوومید ئۆزداگ ببیتە وەزیر مە دەنگێ خوە دا کلچدارۆغلو؟
نھا پرسک ڤەکری ژ ھەدەپێ/پەچەکێ تێ کرن.
باشە وە ژ بۆ چ دەنگێ خوە دا کلچدارۆغلو؟
وە یان ژی ناڤەندا وە یا بریارێ چ پرۆتۆکۆلا ڤەشارتی ل گەل کلچدارۆغلو چێکربوو؟
ھەتا وەک ڤێ گاڤێ ژی نە سەرۆکاتیا ھەدەپێ و نە ژی کەسەک ژ ھەدەپێ نزانە پرۆتۆکۆلا ناڤبەرا قەندیل و جەهەپێ دە چبوو. نھا پشتی ھندەک تشت ئەشکەرە دبن، کارڤەدان بێ فەیدەیە و دورووتیەکا سیاسیە.
