دەستھلاتا ترکیێ د رێیا دەریێ سینۆری یێ گرێ سپی و باب ئەل-ھەوا رە، زێدەتری 360 پەنابەرێن سووری بەر ب دەڤەرێن د بن کۆنترۆلا گرووپێن چەکدارێن ئۆپۆزیسیۆنا سووریێ یێن سەر ب وان ڤە دەرسینۆر کرن.
ل گۆر نووچەیا “نۆرس پرێسس”، دەستھلاتا ترکیێ دوھی سێشەمبێ 5ێ ئیلۆنێ، زێدەتری 120 پەنابەرێن سووری د رێیا دەریێ گرێ سپی رە و 240 پەنابەر د رێیا دەریێ باب ئەل-ھەوا رە ژ ناڤا خاکا خوە دەرسینۆر کرن و رادەستی پۆلیسێن لەشکەری کرن.
دەمەکە حکوومەتا ترکیێ رۆژانە ھەژمارەک پەنابەرێن سووری ڤەدگەرینە ھەرێمێن ئدلب، عەزاز، سەرێ کانیێ و گرێ سپی. چالاکڤانێن سووری ژی دبێژن، پرۆسەیا ڤەگەراندنا پەنابەران ب دارێ زۆرێ تێ کرن و بانگ ل جڤاکا ناڤدەولەتی دکن کو ب ئەرکێ خوە ل ھەمبەر ڤێ رەوشێ رابن.
ل گۆری چالاکڤانان، پرۆسەیا دەرسینۆرکرنێ، پشتی وەرگرتنا ھەموو بەلگە و پەنجەمۆرێن تلیێن پەنابەرێن تێ کرن، ژ بۆ نکاربن جارەکە دن ڤەگەرن.
ل گۆری زانیاریان، تەنێ د 5 رۆژێن دەستپێکێ یێن مەھا ئیلۆنێ دە، دەستھلاتا ترکیێ زێدەتر ژ 1900 پەنابەرێن سووری د دەریێن گرێ سپی، باب ئەل-سەلامە و باب ئەل-ھاوا رە دەرسینۆر کرنە.
ڤەگەراندنا پەنابەرێن سووری بۆ ناڤچەیێن د بن کۆنترۆلا ھێزێن ترکیێ و ئۆپۆزیسیۆنا سووریێ دە، پشتی وێ یەکێ تێ، سەرۆککۆمارێ ترکیەیێ رەجەپ تەییب ئەردۆگان پێشتر راگھاندبوو، ئەو دێ زێدەتر ژ ملیۆنەک پەنابەرێن سووری بۆ ناڤچەیێن کو د بن کۆنترۆلا ئارتەشا ترکیێ دە نە ڤەگەرینن.
چالاکڤانێن عەفرینێ ژی دبێژن، د چارچۆڤەیا پرۆسەیا بجھکرنا پەنابەرێن دەرسینۆرکری و پلانا گوھارتنا دەمۆگرافیا عەفرینێ دە، ترکیە ھەژمارەک کۆمەلگەھێن نشتەجیبوونێ ل عەفرینێ ئاڤا دکە.
