پینتاگۆن بانگ ل ئالیێن ناکۆک ل دێرەزۆرێ دکە کو شەر راوەستینن

سەکرەتەرێ رۆژنامەڤانی یێ وەزارەتا بەرەڤانیێ یا ئامەریکایێ (پینتاگۆن) پات ریدەر داخواز ژ ئالیێن شەرکەر یێن ل باکورێ رۆژھلاتێ سووریێ کر کو شەری راوەستینن و گرنگیێ بدن شەرێ ل دژی داعشێ.

پات ریدەر د کۆنفەرانسەکە رۆژنامەڤانی دە راگھاند، ئامەریکا ژ نێزیک ڤە پێشھاتێن ل باکورێ رۆژھلاتێ سووریێ دشۆپینە و ھێزێن وان ل ھەرێمێ تەکەزی ل سەر شەرێ ل دژی داعشێ دکن و کارێ وان لگەل ھێزێن سووریەیا دەمۆکراتیک (ھەسەدێ) دێ بەردەوام بە.

ھەروھا ھشیاری ژ دوورکەتنا ژ شەرێ ل دژی داعشێ دا، کو دێ ببە سەدەما نەئارامیێ و دێ مەترسیا ڤەگەرا داعشێ زێدە بکە.

ژ رۆژا 27ێ تەباخا 2023 ڤە، ژ ئەنجاما گرتنا فەرماندارێ ئەنجوومەنا لەشکەری یا دێرازۆرێ ئەبوو خەولە ژ ئالیێ ھەسەدێ ڤە، شەر و ئالۆزی د ناڤبەرا ھەردو ئالیان دە دەرکەتیە.

جیگرێ ئالیکارێ وەزیرێ دەرڤە یێ ئامەریکا ئیسان گۆلدرچ و فەرماندارێ ھەڤپەیمانیا ناڤدەولەتی یا ل دژی داعشێ گەنەرال جۆیل ڤۆل ژی رۆژا 3ێ ئیلۆنێ لگەل ھەسەدێ، مەسەدێ و سەرۆکێن عەشیرێن دێرازۆرێ جڤیان.

ل گۆری داخویانیەکا بالیۆزخانەیا ئامەریکایێ ل شامێ، د جڤینێ دە ئالیان ل سەر چەند مژاران لھەڤ کرن، ژ وان ژی گرنگیا چارەسەرکرنا گلیێن خەلکێ دێرەزۆرێ، مەترسیێن دەستێوەردانا دەرڤە د رەوشا دێرەزۆرێ دە، گرنگیا راوەستاندنا شەر د زووترین دەم دە و پاراستنا سڤیلان.

د داخویانیێ دە ھات گۆتن کو گۆلدرچ و گەنەرال ڤۆل تەکەزی ل سەر ھەڤکاریا لگەل ھێزێن سووریەیا دەمۆکراتیک د شەرێ ل دژی داعشێ دە کرنە.