چەکدارێن پەکەکێ گولـلە بەردان ترومبێلەکێ و دو کەس بریندار کرن
چەکدارێن پەکەکێ ل خانەسۆرێ یا سەر ب باژارۆکێ سنوونێ گولـلە بەردان ترومبێلەکێ و ب ڤێ سەدەمێ 2 کەسێن د ناڤا ترومبێلێ دە ب گرانی بریندار بوون.
چاڤکانیێن تایبەت یێن پێگەها دارکا مازی ئەشکەرە کرن، ل رۆژا 1/8/2023 دەمژمێر 3 سەرێ سبێ چار چەکدارێن پەکەکێ ل ناڤچەیا خانەسۆرێ یا سەر ب باژارۆکێ سنوونێ گولـلە ل ترومبێلەکێ رەشاندنە کو دو کەس تێ دە بوونە، پشت رە کەسێن د ترومبێلێ دە ژ ئالیێ چەکدارێن پەکەکێ ڤە ژ ترومبێلێ تێن دەرخستن و ژ وان رە تێ گۆتن کو “هوون چەکدارێن مە درەڤینن”.
تەڤی کو ڤان 2 کەسان ژ چەکدارێن پەکەکێ رە راگهاندنە کو ئەو ئالیگر و ئالیکارێن پەکەکێ نە ژی، لێ بەلێ چەکدارێن پەکەکێ گولـلە بەردان لنگێن وان و ئەو ب گرانی بریندار کرن.
چاڤکانیێن دارکا مازی ئەشکەرە کرن، پشتی کو بەرپرسێ وان چەکداران ب ڤێ مژارێ دزانە، ژ وان رە دبێژە کو وان شاشتی کریە و ئەڤ 2 کەس ئالیکارێن پەکەکێ نە و پێویست دکە ژ بۆی تەداویکرنا وان 2 کەسان ب لەزگینی ئەو ژ بۆی نەخوەشخانەیا گوندێ بارێ یێ سەر ب باژارۆکێ سنوونێ بێن شاندن و نابە ب ت ئاوا ئەڤ بوویەر ئەشکەرە ببە و بگهیژە مەدیایێ.
ناڤێن وان 2 کەسان ئەڤن:
عەلی حسین، ژ باژارۆکێ گر عزێرێ یە، ژ هۆزا کورکورکا یە، نیشتەجیێ خانەسۆرێ یە و ئەندامێ ئیستیخباراتا یەبەشێ یە، کەسەکی نێزی عارف قەیرانی بەرپرسێ ئیستیخباراتا یەبەشێ یە، ئەو قاچاخچیتیێ ژ پەکەکێ رە دکە ب تایبەتی ژ ئالیێ ڤەگوهەستنا چەکدارێن پەکەکێ ژ ئیراقێ بۆ سووریێ و بەرەڤاژی.
خزر حەسکانی، ژ باژارۆکێ سنوونێ یە، ئالیگر و هاریکارێ پەکەکێ یە و قاچاخچیتیێ ژ پەکەکێ رە دکە.
ل گۆر ئاگاهیێن پێگەها دارکا مازی، لنگەکی خزر هەسکانی ب گرانی بریندار بوویە و ژ بۆی نەخوەشخانەیا باژارێ مووسلێ هاتیە ڤەگوهەستن، پەکەکێ ژ وی رە راگهاندیە کو وێ تەڤ تێچوونێن تەداویکرنا وی ب ستوویێ خوە ڤە بگرن و هەگەر ل نەخوەشخانەیا مووسلێ نەیێ تەداویکرن وێ ژ بۆی باژارێ سلێمانیێ بێ ڤەگوهەستن، لێ بەلێ دختۆران ژ وی رە راگهاندیە کو بچە هەر دەرێ پێویست دکە لنگێ وی وەرە برین، هەر وەها لنگەکی عەلی حسین ب سڤکی بریندار بوویە و نها رەوشا وی یا تەندروستی باشە.
