سەرۆککۆمارێ ترکیێ رەجەب تەییب ئەردۆگان ئەشکەرە دکە، ئامەریکا ژ بۆ دایینا فرۆکەیێن F-16 مەرجا ئەندامەتیا سوێدێ بۆ ناتۆیێ ددە پێشیا وان.
سەرۆککۆمارێ ترکیەیێ رەجەب تەییب ئەردۆگان د گۆتارا خوە یا ل لووتکلەیا G20ێ دە ئەشکەرە کر، وی دگەل سەرۆکێ ئامەریکایێ جۆ بایدن ھەڤدیتنەک کورت کریە و ئامەریکا ژ بۆ دایینا فرۆکەیێن F-16 مەرجا ئەندامەتیا سوێدێ بۆ ناتۆیێ ددە پێشیا ترکیەیێ، لێ ئەو شەرتەکی ب ڤی رەنگی راست نابینن، بێیی کو سوێد پابەندێ سۆزێن خوە بە.
ئەردۆگان گۆت، ھەتا کو پارلامەنتۆیا ترکیەیێ ئەندامەتیا سوێدێ بۆ ناتۆیێ قەبوول نەکە، ئەو ژی نکارە قەبوول بکە. ئەو نکارە ب سەرێ خوە بریارێ ل سەر ئەندامەتیا سوێدێ بدە. ھەتا سوێد بەرپرسیاریێن خوە نەینە جھ، ئەوێ چاڤەرێیا بریارا پارلامەنتۆیا وەلاتێ خوە بە.
دوھی 9 ئیلۆنا 2023، 18 لووتکەیا وەلاتێن گرووپا G20ێ ب ئامادەبوونا سەرۆکێ ئامەریکایێ جۆ بایدن، سەرۆکێ فرانسایێ ئەمانوئێل ماکرۆن و سەکرەتەرێ گشتی یێ نەتەوەیێن یەکبوویی ئانتۆنۆ گوتیڕەس و چەندین سەرکەردەیێن دن، ل باژارێ نیو دەلھی یێ ھندستانێ دەست پێ بکە.
لووتکەیا G20ێ ل نیو دەلھی دێ دو رۆژ بدۆمە و مژارێن سەرەکەیێن لووتکەیێ؛ مژارا ئاساییشا خوراکێ، ئابۆریا دیجیتالی، چاندنی، شەرێ ئوکراینایێ و ئەنەرژی یە.
لووتکەیا G20 ژ بیست وەلاتێن خوەدی ئابۆریا ھەری بھێز یێن جیھانێ پێک تێ و ژ سالا 1999 ڤە ھاتیە دامەزراندن. لووتکەیا ھەری داوی یا G20ێ، پار ل گراڤا بالی یا ئەندۆنیزیایێ ھات لدارخستن.
