ل دیاربەکرێ پارتیا ئازادیا کوردستانێ (پاک) و تەڤگەرا دەمۆکراتیکا کوردستانێ (تەدەکە-تەڤگەر) د ناڤێ پارتیا وەلاتپارێزێن کوردستانێ (PWK) دە یەکیتیا خوە راگھاندن.

ل دیاربەکرێ، بەرپرسێن پاک و تەدەکە-تەڤگەر ئیرۆ 12ێ ئیلۆنا 2023 کۆنفەرانسەکا رۆژنامەڤانی لدار خستن و تێ دە ئاڤاکرنا پارتییا وەلاتپارێزێن کوردستانێ (PWK) ژ رایا گشتی رە راگھاندن.

سەرۆکێ گشتی یێ پارتییا وەلاتپارێزێن کوردستانێ (PWK) داخویانیا ھەڤگرتنێ خوەند و تێ دە راگھاند، تەدەکە-تەڤگەر و پاکێ د رۆژێن 9 و 10ێ ئیلۆنا 2023 دە ل دیاربەکرێ کۆنگرەیا خوە یا یەکتییێ ل دار خستن و پارتییا وەلاتپارێزێن کوردستانێ (PWK) ئاڤا کرن.

داخویانیا پارتییا وەلاتپارێزێن کوردستانێ (PWK):

ئەم مزگینییا ئاڤاکرنا پارتییا وەلاتپارێزێن کوردستانێ (PWK) ب رایا گشتی رە پارڤە دکن!

ئەم وەک تەدەکە-تەڤگەر و پاک، ب دلخوەشی دخوازن مزگینییێ بدن ملەتێ کورد و کوردستانیان کو مە کۆنگرەیا خوە یا یەکتییێ ل ئامەدێ ب ئاوایەکی گەش، گرسەیی و سەرکەفتی پێک ئانی و مە  ب ناڤێ پارتییا وەلاتپارێزێن کوردستانێ (PWK) ئاڤا کر.

ئیرۆ 43یەمین سالڤەگەرا کۆدەتایا لەشکەری یا 12ێ ئیلۆنا 1980یی یە. ئەم وەک دامەزرینەرێن پارتییا وەلاتپارێزێن کوردستانێ (PWK) ڤێ داربەیا لەشکەری، فاشیست روورەش دکن و دبێژن دامەزراندنا پارتییا وەلاتپارێزێن کوردستانێ (PWK)، د ھەمان دەمێ دە بەرسڤ، نیشانا بەردەوامییا بەرخوەدان و تێکۆشینا ل دژی  زلم، زۆرداری و قەتلیعامێن کۆدەتایا 12ێ ئیلۆنێ یە ژی. مە دوھ سەرێ خوە نەتەواند و ئەم ئیرۆ ژی ل بەر زلمێ و زۆردارییێ سەرێ خوە ناتەوینن.

د دەستپێکا گولانا سالا 2022 دە تەدەکە-تەڤگەر و پاکێ ژ بۆ رێلبەرڤەکرنا یەکیتییەکا سییاسی و رێخستنی دییالۆگەک دەستپێ کرن و پشتی خەباتەکە بەرفرەھ یا ھەڤبەش، بریار دان کو ب کۆنگرەیەکێ ل باکورێ کوردستانێ ب ھەڤ را پارتییەکە نەتەوەیی، دەمۆکراتیک، یاسایی و گرسەیی ئاڤا بکن.

تەدەکە-تەڤگەر و پاکێ  د رۆژێن 9 و 10ێ ئیلۆنا 2023یێ دا ل ئامەدێ کۆنگرەیا خوە یا یەکتییێ ل دار خستن و پارتییا وەلاتپارێزێن کوردستانێ (PWK) ئاڤا کرن.

موستافا ئۆزچەلیک، د کۆنگرەیا دامەزراندنێ یا پارتییا وەلاتپارێزێن کوردستانێ (PWK) دا،  ب یەکدەنگی وەک سەرۆکێ گشتی یێ PWK ھاتە ھلبژارتن.

پارتییا وەلاتپارێزێن کوردستانێ (PWK)، خوە بەردەوامییا دۆزا ئازادییا کوردستانێ، بەردەوامییا ھەموو تێکۆشین، خەبات، کەد و نرخێن ملی، دەمۆکراتیک، نیشتیمانی یێن کوردستانێ دبینە.

پارتییا وەلاتپارێزێن کوردستانێ (PWK)، مافێ چارەنووسییا ملەتێ کورد و گەلێ کوردستانێ دپارێزە. مافێ چارەنووسییێ ل گۆری شەرت و مەرجێن کوردستانێ و تەڤگەرا رزگاریخوازییا نەتەوەیی، ھەروەھا ل گۆری رەوشا ھەرێمێ و ناڤنەتەوەیی دکارە  ب ئاوایێ دەولەتەکە فەدەرال، کۆنفەدەرال یان ژی سەربخوە بێ پێکانین.

ھەروەھا ل گۆری شەرت و مەرجێن نەتەوەیی، رەوشا ھەرێمێ و ناڤنەتەوەیی دکارە چارەسەرییێن جھی و قۆناغی  ژی دەرکەڤن ھۆلێ. د رەوشەک وەھا دە، ئەم دێ چارەسەرییێن دەمکی و قۆناغی رەد نەکن و وان ژ بۆ بدەستخستنا ئارمانجێن سەرەکە و ستراتەژیک وەکە دەرفەتێن گرینگ و پێویست بنرخینن.

پارتییا وەلاتپارێزێن کوردستانێ (PWK)، ل گەل بەرنامەیا خوە یا ستراتەژیک یا مافێ چارەنووسییێ دێ  ل سەر بەرنامەیا داخوازێن بلەز یێن ملەتێ کورد ژی دێ خەبات و تێکۆشینا خوە بمەشینە.

بێگوومان، پێویستییا یەکتییا سییاسی و رێخستنی یا پارتی، تەڤگەر، رێخستن، گرووپ و کەسایەتێن ملی، دەمۆکرات، ئازادیخواز، کوردستانی یێن کو بەرنامە و نێرینێن وان یێن سییاسی وەک ھەڤن، نێزی ھەڤن، ب ئاڤا کرنا پارتییا وەلاتپارێزێن کوردستانێ (PWK) ب داوی نایێ. پارتییا وەلاتپارێزێن کوردستانێ (PWK) ،د ھەر قۆناغێ دە ئامادە یە کو ب پارتی، تەڤگەر، رێخستن، گرووپێن وەک وێ، نێزی وێ را یەکتییا سییاسی و رێخستنی پێک بینە.

ئاڤاکرنا پارتییا وەلاتپارێزێن کوردستانێ (PWK)، ھەلبەتە کو پێویستییا ھەڤکاری و تفاقێن نەتەوەیی، دەمۆکراتیک ژ ھۆلێ راناکە. ھەڤکاری و تفاقێن نەتەوەیی، دەمۆکراتیک یێن ل سەر پرەنسیبێن نەتەوەیی، کوردستانی بێنە ئاڤا کرن پێویستی و وازیفەیەکە مە یا سەرەکە یا مللی یە. لێ ئاشکەرەیە کو ل باکورێ کوردستانێ پارتییەکا خورت، گرسەیی، مللی، دەمۆکرات، ئازادیخواز، کوردستانی دێ د ئاڤاکرن، برەڤەبرن و بەردەوامییا پلاتفۆرم، ھەڤکاری، تفاق و ب ھەڤ رە خەباتێن ھەڤبەش یێن مللی، دەمۆکراتیک ژی ببە بنگەھەکی ئەساسی.

ب ڤێ ھشمەندییێ، ئەم وەک پارتییا وەلاتپارێزێن کوردستانێ (PWK)،  بانگ دکن کو، ھەموو سیاسەتمەدار، رەوشەنبیر و وەلاتپارێزێن کوردستانێ یێن وەک مە و یێن  نێزی مە دفکرن، ژ دەرڤەیی ڤێ پارتییا مە یا نەتەوەیی، دەمۆکراتیک، ئازادیخواز، کوردستانی، مەشرووع، لەگال نەمینن؛ ب بەشدارییا خوە، پارتییا خوە بەرفرەھتر و دەولەمەندتر بکن. وەرن ئەم ب ھەڤ رە ژ بۆ خورتکرن و بەرفرەھ کرنا تەڤگەرا رزگاریخوازییا نەتەوەیی و دەمۆکراتیک و بجیھانینا ئارمانجێن مە یێن ستراتەژیک ڤێ  پارتییا خوە خورت و گەش بکن!

پارتییا ئازادییا کوردستانێ (PWK) د رۆژا 17ێ ئیلۆنا 2023یێ دا دێ  کۆنگرەیا خوە یا 3یەمین یا ئاسایی ل ئەنقەرەیێ  ل دار بخە. د ڤێ کۆنگرەیێ دە، ئەمێ ناڤ، پرۆگرام و بەرنامەیا پاکێ بگوھەرینن و ب ناڤێ پارتییا وەلاتپارێزێن کوردستانێ (PWK) ، وەک پارتییەکە نوو و یاسایی  خەباتێن خوە بمەشینن.

ئەم دێ پشتی کۆنگرەیا یاسایی، داخویانی و بەرنامەیا پارتییا نوو ژ رایا گشتی رە، ژ کورد و کوردستانییان رە پار ڤە بکن!

ئەم سپاسییا ھەموو پارتی و رێخستنێن سییاسی، دەزگەھێن سڤیل و کەسایەتان دکن کو رۆژا 9ێ ئلۆنا 2023یێ بەشداری کۆنگرەیا مە یا دامەزراندنێ بوونە، ب پەیامێن خوە پیرۆزباھییا مە کرنە.

پارتییا وەلاتپارێزێن کوردستانێ (PWK)، ل گەلێ مە پیرۆز بە!

12/9/2023

موستافا ئۆزچەلیک

سەرۆکێ گشتی یێ پارتییا وەلاتپارێزێن کوردستانێ PWK