ھلبژارتنێن شارەداریێن نەرویجێ برێڤە چوون و تێ دە دو کورد ب سەر کەتن، کو یەک ژ وان د ناڤا نێزیکی پێنج سەد رکابەران کاری د مەزنترین ھلبژارتنێن باکورێ نەرویجێ دە سەرکەفتنێ ب دەست بخە.
رۆژێن 8 ھەتا 11 ئیلۆنا 2023، ھلبژارتنێن شارەداریێن نەرویجێ برێڤە چوون، کو تێ دە 32 کورد کاندید بوون، ژ وان کاندیدان عەلی ھرووری، کو جوانەکی خەلکێ گوندێ ھروورێ یێ سەر ب دەڤەرا بەرواری بالا یێ پارێزگەھا دوھۆکێ یە، کاریە د ناڤ رکابەریا نێزیکی 500 کاندیدان ب سەر بکەڤە و ببە ئەندامێ ئەنجوومەنێ.
عەلی ھرووری پێشتر جیگرێ پارێزگارێ بۆدۆیێ ب وەکالەت وەرگرتبوو، 16 سال ژی سەرۆک و ئەندامێ فراکسیۆنا پارتیا کارکەرێن نەرویجێ بوویە ل ئەنجوومەنا شارەداریا بۆدۆ، کو ناڤەندا ھەرێما ئۆلاندە.
ل ئالیێ دن، سەگڤان گولی کو وەلاتیەکی خەلکێ زاخۆیە و جارا دویەم د ھلبژارتنێن شارەداریێن نەرویجێ دە ب سەر دکەڤە و دبە ئەندامێ شارەداریا ئۆلاسوند.
د ڤێ ھلبژارتنێ دە وەکە ھلبژارتنێن بۆری، ھەژمارا وان کوردێن کو خوە نامزەد کربوون، د ناڤبەرا 30 بۆ 40 کەسان دە بوو و ئارمانجا وان ئەو بوو کو دەنگێ پێویست ب دەست بخن و بگھن شارەداریێن وی وەلاتی، کو ھەژمارا وان 350 شارەدارینە.
