دەستھلاتا ترکیێ د 24 دەمژمێرێن بۆری دە زێدەتری 500 پەنابەرێن سووریێ دەرسینۆر کرن.
ل گۆر مالپەرا “نۆرس پرێس”، دەستھلاتا ترکیێ دوھی چارشەمبێ 13 ئیلۆنێ، زێدەتری 80 پەنابەرێن سووری د دەریێ گرێ سپی رە و 420 پەنابەر د دەریێ باب ئەل-ھەوا رە ژ ناڤا خاکا خوە دەرسینۆر کرن و رادەستی گرووپێن چەکداران یێن سەر ب ترکیێ ڤە کرن.
ل گۆری زانیاریان، پرۆسەیا دەرسینۆرکرنێ پشتی وەرگرتنا ھەموو بەلگە و پەنجەمۆرێن تلیێن پەنابەرێن ھات کرن، ژ بۆ نکاربن جارەکە دن ڤەگەرن.
دەمەکە حکوومەتا ترکیێ رۆژانە ھەژمارەک پەنابەرێن سووری ڤەدگەرینە ھەرێمێن ئدلب، ئەزاز، سەرێ کانیێ و گرێ سپی. چالاکڤانێن سووری ژی دبێژن، پرۆسەیا ڤەگەراندنا پەنابەران ب دارێ زۆرێ تێ کرن و بانگ ل جڤاکا ناڤدەولەتی دکن کو ب ئەرکێ خوە ل ھەمبەر ڤێ رەوشێ رابن.
ل گۆری زانیاریان، ژ دەستپێکا ڤێ مەھا ئیلۆنێ ڤە، دەستھلاتا ترکیێ زێدەتر ژ 5500 پەنابەرێن سووری د دەریێن گرێ سپی، باب ئەل-سەلامە و باب ئەل-حەوا رە دەرسینۆر کرنە.
ڤەگەراندنا پەنابەرێن سووری بۆ ناڤچەیێن د بن کۆنترۆلا ھێزێن ترکیێ و ئۆپۆزیسیۆنا سووریێ دە، پشتی وێ یەکێ تێ، سەرۆککۆمارێ ترکیەیێ رەجەب تەیب ئەردۆگان پێشتر راگھاندبوو، ئەو دێ زێدەتر ژ ملیۆنەک پەنابەرێن سووری بۆ ناڤچەیێن کو د بن کۆنترۆلا ئارتەشا ترکیێ دە نە ڤەگەرینن.
