ئاژانێن «ئیستخباراتا ئیراقێ» یێن د ناڤا یه‌نه‌كێ ده ئاشكه‌ره بوون كو راپۆر و ئاگاهیێن بێ بنگه‌هـ ده‌ربارێ كادرۆیێن په‌ده‌كێ دشاندن.
چاڤكانیێن پێگه‌ها «داركا مازی» ئاگاهیێن تایبهت ده‌ربارێ هنه‌ك ژ ئاژانێن ئیستخباراتا ئیراقێ یێن د ناڤا ئۆرگانێن یه‌نه‌كێ ده ب ده‌ست خستنه كو هه‌ر چ كارێ قرێژ، راپۆرێن نه‌راست و تۆهمه‌تێن بێ بنگه‌هـ ل سه‌ر كادرۆیێن په‌ده‌كێ د شاندن ژ بۆ كو بێن ده‌سته‌سه‌ر كرن.
یێك ژ وان ئاژانان به‌رپرسه‌كی یه‌نه‌كێ یه ب ناڤێ «غازی فه‌یسه‌ل» و هه‌ر وها كوڕێ وی یێ ب ناڤێ «قه‌ره‌چۆغ»، ئه‌و ل مه‌لبه‌ندێ مه‌خموورێ د خه‌بتن و وه‌كه چاڤكانی ژ بۆی سازییا «ئیستخبارات و دژه ته‌رۆرا ئیراقێ» د خه‌بتن.
چاڤكانیێن مه ئاشكه‌ره كرن كو غازی و كوڕێ وی قه‌ره‌چۆغ، ئاگاهیێن جۆر ب جۆر ب تایبهت ده‌ربارێ داعشێ ژ بۆی عه‌قید «به‌شیر كه‌نعان» به‌رپرسێ یه‌كه‌یا ئیستخباراتا فه‌رماندارێتیا دویه‌مین ئا دژه ته‌رۆرا ئیراقێ د شاندن، هه‌ر وها وان پێوه‌ندییا راسته راست ب لیوا روكن «حه‌یده‌ر ئه‌لعوبێدی» فه‌رماندارێ فه‌رماندارێتیا ئۆپه‌راسیۆنێن دویه‌مین یا دژه ته‌رۆرێ ڤه هه‌یه.
چاڤكانیێن مه ئاماژه كرن، ل ده‌ما كو مه‌فره‌زه‌یێن تیما هه‌شته‌مین و فه‌وجا گه‌یاره ده‌ردكه‌ڤن ئۆپه‌راسیۆنێ، ل ده‌ستپێكێ ل مالا قه‌ره‌چۆغ جێگیر دبن و پشتره ده‌ردكه‌ڤن و جارنا قه‌ره‌چۆغ ب خوه ژی ب وان ره به‌شداری ئۆپه‌راسیۆنان دبه.
ل گۆری ئاگاهیێن ده‌ستێ مه، قه‌ره‌چۆغ ل رۆژا 2 تیرمه‌ها ئیسال 2023ان راپۆره‌كه ئاگاهیێن شاش ژ بۆی «عه‌قید به‌شیر» ده‌ربارێ كادرۆیه‌كی په‌ده‌كێ یێ مه‌خموورێ شاندیه و تێ ده گۆت بوو كو ئه‌ڤ كادرۆیێ په‌ده‌كێ ژ بۆ به‌رژه‌وه‌ندیا رێخستنا ته‌رۆرێ یا داعشێ ل «ویلایه‌تا دیجله‌یێ» دخه‌بته، چه‌كان و خوارنێ ژ وان ره دشینه، جارنا ژی ب میره‌كێ داعشێ یێ ب ناڤێ «جه‌مال خه‌لیفه شه‌هاب مه‌نسوور ئه‌لجبووری» ل چیایێن (كراو، قه‌ره‌چوغ و له‌گجه) دجڤه و ب هه‌ڤره چوون و هاتنێ ژ بۆی گوندێن (چاربردان) یێ گرێدای باژارۆكێ قه‌راچێ دكن و پشتره ل بیستانێ كه‌سێ ب ناڤێ «عه‌بدولئه‌حه‌د» دمینن كو ئه‌ڤ بیستان هه‌زار مه‌ترویان دووری نوقته‌یه‌كه لیوایا 51 / فرقه‌یا 14 ئا ئارتیشا ئیراقێ یه.
كوڕێ به‌رپرسێ یه‌نه‌كێ قه‌ره‌چۆغ د راپۆرا خوه ئا كو ژ بۆی ئیستخباراتا ئیراقێ شاندی دبێژه: ل سالا 2021 ئه‌ڤ كادرۆیێ په‌ده‌كێ ب تۆهمه‌تا تێكلییا ب داعشێ ره، ژ هێلا فرقه‌یا 14 ئا ئیستخباراتا ئیراقێ ڤه هاتیه ده‌سته‌سه‌ر كرن، لێبه‌لێ پشتره و ژبه‌ر كو تو به‌لگه و ده‌لیله‌ك ل سه‌ر وی تونه بوون، سه‌ربه‌ست تێ به‌ردان.
چاڤكانیێن «داركا مازی» گرێدای مژارێ ئاشكه‌ره كرن كو پشتی ئه‌ڤ راپۆر ژ هێلا «قه‌ره‌چۆغ» ڤه ژ بۆی ئیستخباراتا ئیراقێ تێ شاندن، لیوا روكن «حه‌یده‌ر ئه‌لعوبێدی» فه‌رمانێ ل عه‌قید «به‌شیر» دكه كو هه‌ول بێن دایین كو ئه‌ڤ كادرۆیێ په‌ده‌كێ وه‌كه چاڤكانی ژ بۆی به‌رژه‌وه‌ندییا وان وه‌ره ته‌جنید كرن.
هه‌ر وها ئاشكه‌ره كرن كو ل 21 ته‌باخا ئیسال 2023ان موقه‌دم «ئوسامه» كو ئامرێ یه‌كه‌یا دووڤچوونێ یه و هه‌ر وها میلازم «حسێن كامل ئه‌لساعدی» یێ ئامر تیما هه‌شته‌مین تێن راسپاردن و دچن مالا ڤی كادرۆیێ په‌ده‌كێ و ژێ خوه‌ستن كو ژ بۆی به‌رژه‌وه‌ندیا وان وه‌كه چاڤكانی بخه‌بته.
چاڤكانیێن داركا مازی ئاشكه‌ره كرن كو كادرۆیێ په‌ده‌كێ ژ ئه‌فسه‌رێن ئیستخباراتا ئیراقێ ره گۆت كو ئه‌و كادرۆیێ په‌ده‌كێ یه و ئه‌و دزانه كو به‌رپرسێ یه‌نه‌كێ یێ ب ناڤێ «غازی و كوڕێ وی قه‌ره‌چۆغ» ئاگاهیێن نه‌راست ده‌ربارێ وی دانه وان و هه‌ر وها ژێ ره دبێژه: «ئه‌ڤ كه‌س دژی په‌ده‌كێ نه و ت سووده‌كه وان ژ بۆی وه نابه».
ژ پشتی خیانه‌تا 16ی جۆتمه‌ها سالا 2017ان یه‌نه‌كه ب ته‌مامه‌تی كه‌تییه ژێر هه‌ژموونا حه‌شدا شه‌عبی و ئیستخباراتا ده‌وله‌تا ئیراقێ و ده‌ستێ وێ د ده‌هان كریز و كێشه‌یێن كو ل هه‌رێما كوردستانێ چێبوونه هه‌یه، ل ناڤچه‌یێن كو په‌كه‌كه ژی لێ یه، كادرۆیێن یه‌نه‌كێ وه‌كه چاڤكانی ب راپۆرێن ئیستخباراتی یێن ده‌ره‌و شه‌ره‌كی قرێژ ژ بۆ نه‌هشتنا كادرۆیێن په‌ده‌كێ د مه‌شینن.
