رێکارێن دەستپێکرنا هناردەکرنا پەترۆلا کوردستانێ دەست پێ دکە
شاندەکە سۆمۆ، وەزارەتا پەترۆلێ یا ئیراقێ و هەرێما کوردستانێ سەردانا ترکیێ کر و ل گەل ئالیێ ترکیێ ژ نێزیک ڤە رەوشا بۆریا پەترۆلێ شۆپاندن. د گاڤا یەکەم دە ژی، پەترۆل دێ وەکە جەرباندنەکێ ب رێیا بۆریان بێ هناردەکرن.
ئەندامێ کۆمیتا پەترۆل و گازێ یا پارلامەنتۆیا ئیراقێ سەباح سوبحی ژ کوردستان24ێ رە راگهاند: «نرخا پەترۆلێ ل جیهانێ هەر دچە بلند دبە و ئه‌مەریکا ژی ناخوازە نرخێ پەترۆلێ بلند ببە. ئه‌مەریکا دخوازە بەرهەمانینا پەترۆلا خاڤ ل هەرێما کوردستانێ بەردەوام بە. خالەکە دن ژی ئەوە کو د سەردانا خوە یا ڤێ داویێ بۆ ئه‌مەریکایێ دە پەیامەک زەلال ژ محەمەد شه‌یاع سوودانی رە هات دایین کو دڤێ چارەسەریەکێ ژ پرسگرێکێن ناڤبەرا هەرێما کوردستانێ و حکوومەتا ئیراقێ رە ببینن».
پێشتر ژی وەزیرێ ئەنەرژیێ یێ ترکیێ گۆتبوو، بۆریێن پەترۆلێ ژ ئالیێ تەکنیکی ڤە ئامادەنە و ئەم خوە ئامادە دکن کو هناردەکرنا پەترۆلێ ژ هەرێما کوردستانێ جارەکە دن دەستپێ بکە.
ل گۆری پسپۆرێن ئابۆری، ئیراق و ترکیە سوودمەندێ سەرەکەیێ هناردەکرنا پەترۆلێ نە، ژ بەر کو د رێکەفتنا هەولێر و بەغدایێ و یاسایا بودجەیێ دە هاتیە گۆتن کو دڤێ هەرێما کوردستانێ رۆژانە 400 هەزار بەرمیل پەترۆل رادەستی سۆمۆ بکە، ل هەمبەر ژی دڤێ مافێن دارایی یێن هەرێما کوردستانێ ژ ئالیێ بەغدایێ ڤە وەرە دابینکرن.
ئابۆریناس محەمەد زراری گۆت: «یەکەمین زرارمەندێ راوەستاندنا هناردەکرنا پەترۆلا کوردستانێ، حکوومەتا ئیراقێ یە، کو مەهانە زێدەتری 1 ملیار دۆلار زرارێ دگهینە بودجەیا ئیراقێ. ترکیە پشتی هەرێما کوردستانێ د رێزا دویەمین دە یە کو ژ سەدی 80ێ کەسێن کو د سەکتۆرا پەترۆلێ دە دخەبتن بێکار مانە، لێ د گاڤا یەکەما دەستپێکرنا هناردەکرنا پەترۆلێ دە، ئەوێ ڤەگەرن سەر کارێن خوە».
