د شەر و پەڤچوونێن د ناڤبەرا ھەسەدێ و چەکدارێن خوەجھی یێن کو ژ ھەرێمێن میلیشیایێن ئیرانێ دەرباسی رۆژھلاتێ فراتێ بوونە، 64 کەس ھاتن کوشتن و بریندارکرن.
رەوانگەھا سووری یا مافێن مرۆڤان بەلاڤ کر، ھەژمارەک ژ چەکدارێن سەر ب رێژیما سووریێ ڤە ژ رۆژئاڤایێ چەمێ فراتێ، ژ ناڤچەیێن د بن کۆنترۆلا میلیشیایێن ئیرانێ دە دەرباسی گوندەوارێن زیبان یێ ل رۆژھلاتێ دێرازۆرێ بوون و شەر و پەڤچوون د ناڤبەرا وان و ھەسەدێ دە دەرکەت.
ب دەستپێکا ئێریشێ رە شێخێ عەشیرا ئەل-عەگێدات شێخ ئیبراھیم ئەل-حەفل پەیامەکە دەنگی وەشاند و تێ دە دەستپێکرنا شەرێ نوو یێ “ئارتێشا عەشیران” ل ھەمبەر ھەسەدێ راگھاند.
ل گۆری زانیاریێن رەوانگەھێ، د شەر و پەڤچوونان دە 22 کەس ھاتن کوشتن: 18 چەکدارێن خوەجھی، 3 ژ ھەسەدێ و ژنەکێ.
ھەر وھا 42 کەس بریندار بوون: 4 سڤیل ب تۆپێن رێژیمێ، 26 چەکدارێن خوەجھی و 12 ئەندامێن ھەسەدێ د شەر و پەڤچوونێن بەردەوام دە.
ژ ئالیێ خوە ڤە، ناڤەندا راگھاندنێ یا ھەسەدێ ب داخویانیەکێ راگھاند، 2 کۆمێن چەکدار ئێن گرێدایی ھێزێن حکوومەتا شامێ د بن تۆپبارانا ھێزێن رێژیمێ دە، دەرباسی ناڤچەیا زیبان یا ل رۆژھلاتێ دێرازۆرێ بوون.
ل گۆری داخویانیا ھەسەدێ، د ئەنجاما شەر و پەڤچوونان دە ھەژمارەک چەکدار ھاتن کوشتن و ھەژمارەکە دن ژی بریندار بوون. د ئەنجاما تۆپبارانا بێسەرووبەر ژ ئالیێ ھێزێن رێژیمێ ڤە ژی، ھەژمارەک سڤیل بریندار بوون و زیانێن مادی ل مالێن وان بوون.
ژ داویا مەھا بۆری ڤە، پشتی گرتنا فەرماندارێ ئەنجوومەنا لەشکەری یا دێرازۆرێ ئەحمەد ئەل خەبیل یێ ب ناڤێ “ئەبوو خەولا” تێ ناسکرن ژ ئالیێ ھەسەدێ ڤە، ئالۆزی و پەڤچوون ل رۆژھلاتێ دێرازۆرێ د ناڤبەرا ھەسەدێ و چەکدارێن خوەجھی دە دەردکەڤن.
ھەسەدێ پێشتر ژی د داخویانیەکێ دە راگھاند، “کەسێ ب ناڤێ ئیبراھیم ئەل-حەفل، سەرۆکێ فتنەیێ یە و ئێدی ژ ئالیێ ھێزێن وان ڤە تێ خوەستن، ژ بەر کو ئەو بوویە سەدەما رژاندنا خوینا شەرڤان و خەلکێ و ل گۆری فەرمانێن ئالیێن دەرڤە سەرکێشیا ھەولدانێن دەرخستنا فتنەیێ دکە.
