جیگرێ فەرماندارێ ئۆپەراسیۆنێن هەڤبەشێن ئیراقێ راگهاند، د چارچۆڤەیا جیبجیکرنا رێکەفتنا ئەولەهیێ دە، وان 12 خال ل سەر سینۆرێ ب ئیرانێ رە ئاڤا کرنە.
جیگرێ فەرماندارێ ئۆپەراسیۆنێن هەڤبەشێن ئیراقێ فەریق روکن قەیس خەلەف محەمەداوی گۆت: «پشتی ئیمزەکرنا رێکەفتنا ئەولەهیێ یا ب ئیرانێ رە، کۆمیتەیەکە بلند ب سەرۆکاتیا شێورمەندێ ئاساییشا نشتیمانی یا ئیراقێ قاسم ئەل-ئه‌عرەجی و ئەفسەرێن پسپۆر ژ وەزارەتێن بەرەڤانی، ناڤخوە و ئاژانسێن ئەولەهیێ هات ئاڤاکرن.
محەمەداوی دا زانین ژی، ئەو کۆمیتە نێزی سالەکێ یە کار ژ بۆ ئاڤاکرنا مەکانیزمەکێ ژ بۆ جیبجیکرنا رێکەفتنێ دکە.
گۆت: «هێزێن پاسەوانێن سینۆر یێن ئیراقی هەموو سینۆرێن ب وەلاتێن جیران رە دپارێزن و ئالیێن دژبەرێن ئیرانی ژ سینۆر هاتنە دوورخستن و ل ناڤچەیێن کو ژ وان رە هاتنە دەستنیشانکرن، هاتنە بجهکرن».
جیگرێ فەرماندارێ ئۆپەراسیۆنێن هەڤبەشێن ئیراقێ دا زانین، 12 خالێن کۆنترۆلێ یێن سینۆری ب ئیرانێ رە هاتنە دانین و پاسەوانێن سینۆر یێن ئیراقی ل ڤان خالان هاتنە بجهکرن.
رۆژا 19ێ ئادارا 2023ان د ناڤبەرا ئیراق و ئیرانێ دە رێکەفتنەکە هەڤبەشا ئەولەهیێ هاتبوو ئیمزەکرن. دو خالێن رێکەفتنا ئەولەهیێ ژی تایبەتن ب ئالیێن دژبەرێن ئیرانێ و کۆنترۆلکرنا سینۆرێن د ناڤبەرا هەر دو وەلاتان دە.
رۆژا 19ێ ئیلۆنا 2023ان ژی، کۆمیتەیا بلندا جیبجیکرنا رێکەفتنا ئەولەکاریا هەڤبەش یا ئیراق و ئیرانێ راگهاندبوو کو بارەگەهێن پارتیێن ئۆپۆزیسیۆنا ئیرانێ ل نێزیکی سینۆرێ ئیرانێ هاتنە ڤالاکرن و هێزێن پاسەوانێن ئیراقێ ژی ل ڤان دەڤەران هاتنە بجهکرن.
دوهی 1ێ جۆتمەها 2023ان ژی شاندەکە پایەبلندا ئەولەکاریا ئیراقێ ب سەرۆکاتیا قاسم ئەل-ئه‌عرەجی سەردانا ئیرانێ کربوو و وەزیرێ ناڤخوەیێ هەرێما کوردستانێ رێبه‌ر ئەحمەد ژی د ناڤ دە بوو. ل گۆر داخویانیا ئۆفیسا قاسم ئەل-ئه‌عرەجی، ئارمانجا سەردانێ تەمامکرنا جیبجیکرنا رێکەفتنا ئەولەهیێ یا د ناڤبەرا ئیراق و ئیرانێ دە یە.
