پشتی تەقینا ئەنقەرەیێ ئەڤ سێ رۆژن بێناڤبەر ئۆپەراسیۆن ل دژی پەکەکێ تێن کرن و ھەژمارا کەسێن کو ھاتنە دەستەسەرکرن گھیشتە 127 کەسان.
ئیرۆ ژی ل 15 باژارێن ترکییێ و باکورێ کوردستانێ ئۆپەراسیۆن ھاتن کرن و 37 کەس ھاتنە دەستەسەرکرن. ب ڤی ئاوایی ژ رۆژا دوشەمبێ ھەتا نھا، 127 کەس ب تۆھمەتا کو پێوەندی لگەل پەکەکێ ھەنە ھاتنە گرتن.
ژ بلی ئۆپەراسیۆنێن ناڤ سینۆرێ ترکیەیێ، ل دەرڤەی سینۆری ژی دو رۆژن بارەگەھێن پەکەکێ ژ ئالیێ فرۆکەیێن شەری یێن ترکیێ تێن بۆمبەبارانکرن.
ل گۆر داخویانیا وەزارەتا بەرەڤانیێ یا ترکیەیێ ژی، 16 خال و بارەگەھێن پەکەکێ یێن ل مەتینایێ، خاکوورکێ، گارێ، قەندیلێ و ئاسۆسێ د ئۆپەراسیۆنێن ئاسمانی دە ھاتنە ژناڤبرن.
ھەر چەند پەکەکێ ناسنامەیا ھەر دو ئەندامێن خوە یێن ئێریشێ وەزارەتا ناڤخوە یا ترکیەیێ کربوون ئەشکەرە کربە ژی، حکوومەتا ترکیەیێ ژی ب داخویانیەکێ ناسانمەیا ئێریشکاران ئاشکەرە کرن کو ئۆزکان شاھینێ ب ناسناڤێ (رۆژھات زیلان) و حەسەن ئۆگوزێ ب ناسناڤێ (ئەردال شاھین)ن. رۆژھات زیلان خەلکێ وانێ، ئەردال شاھین ژی خەلکێ شرنەخێ یە.
ل گۆری مەدیایا ترکیەیێ، ئێریشکەران، ئۆتۆمۆبیلا کو د ئێریشا ئەنقەرەیێ دە بکار ئانینە، ل باژارۆکێ دەڤەلیێ یێ قەیسەریێ دەستەسەر کربوون و ئاژۆکارێ وێ ئۆتۆمۆبیلێ ژی کوشتبوون. سەردۆزگەریا کۆمارێ یا قەیسەریێ ژی د دەرحەقێ دۆسیەیا لێپرسینا وێ بوویەرێ دە ژی بریارا نەھێنیبوونێ دا.
