وەزیرێ دەرڤەیێ ترکیەیێ د بەیانامەیەکێ دە راگەھاند، وەزیرێ دەرڤەیێ ترکیێ ھاکان فیدان، ل ئەنقەرێ لگەل فالح فەیازێ سەرۆکێ دەستەیا حەشدا شەعبی و خەمیس خەنجەرێ سەرۆکێ ھەڤپەیمانیا سیادەیێ کۆم بوو و دەربارێ ناڤەرۆکا وان جڤینان دە چ زانیاریەک نەھاتە ئاشکەرا کرن.
سێ رۆژ بەری نھا رۆژا 4 جۆتمەھا 2023 وەزیرێ بەرەڤانیا ئیراقێ سابت عەباسی ب سەردانەکا فەرمی گەھشت ئەنقەرێ و لگەل وەزیرێ بەرەڤانیا ترکیێ یەشار گولەر روونشت. ل گۆر راگەھاندنا وەزارەتا بەرەڤانیا ترکیێ، “د وێ کۆمبوونێ دە، بەحسا ئالیکاریێن دوئالی د وارێ پیشەسازیا لەشکەری و بەرگریا دوئالی و ھەرێمی ھاتیە کرن”.
ھەروەھا ھات راگەھاندن: “وەزیرێ بەرەڤانیا ترکیێ تەکەزی ل سەر وێ یەکێ کریە کو ترکیا و ئیراق خوەدی پەیوەندیەکا دیرۆکی و جڤاکی یا بھێزن، و بەحسا گرنگیا پێشخستنا ئالیکاریێن د ناڤبەرا ھەردو ئالیان و گاڤێن ھەڤپار کرنە و ب تایبەت د وارێ تەکۆشینا دژی تەرۆرێ و پاراستنا ئەولەھیا سنۆری دە.”
ئەڤ ھەڤدیتن و کۆمبوونێن ناڤبەرا بەرپرسێن ترکیێ و ئیراقێ د دەمەکێ دە نە کو ترکیا گەفێن ئۆپەراسیۆنێن بەژاییێ بۆ سەر ھێزێن پەکەکێ یێن ل دەڤەرێن سنۆری دکە.
دو رۆژێن بۆری دە ژی ترکیێ چەند بارەگەھ و بنگەھێن ھێزێن سووریەیا دەمۆکرات (ھەسەدێ) ل رۆژئاڤایێ کوردستانێ بۆمبەباران کرنە. ل گۆر داخویانیا وەزارەتا بەرەڤانیا ترکیێ، 15 ئارمانج بۆردومان کرنە.
